Amerika qiruvchisi Bahrayn xalqaro aeroportiga favqulodda qo‘ndi

Bahrayn xalqaro aeroportida Amerika qiruvchisi ishtirokida favqulodda holat yuz berdi. Bu haqda Associated Press xabar qilmoqda.

Amerika harbiy-dengiz kuchlari vakili Bill Urbanning so‘zlariga ko‘ra, Fors ko‘rfazidagi “Nimits” aviatashuvchisi bortidan parvoz qilgan F-18 samolyotida dvigatel bilan bog‘liq muammolar yuzaga kelgan. Shu sababdan uchuvchi aeroportga favqulodda qo‘nishga majbur bo‘lgan.

«Havo kemasini nosozlik tufayli uchish-qo‘nish yo‘lagida to‘xtatish mumkin bo‘lmadi, uchuvchi samolyot yo‘lakdan tashqariga chiqib ketgach, xavfsiz holda samolyotdan chiqib oldi», - deya ma'lum qildi Urban.

AQSh harbiy-dengiz kuchlari hodisa yuzasidan surishtiruv ishlarini boshladi.

Ta'kidlanishicha, Bahrayn xalqaro aeroporti ishi vaziyat sabab qisman to‘xtab qolgan.

Avvalroq Yamanda arab koalitsiyasi vertolyoti halokatga uchragani xabar qilingandi.