Eron hukumati AQSh davlat departamentining 2016 yilgi jahondagi din erkinligi haqidagi har yillik an'anaviy hisobotida qilingan xulosalarga qarshi, deb ma'lum qildi Eron tashqi ishlar vazirligi matbuot kotibi Bahrom Qosimiy.
“Eron bunga muayyan siyosiy maqsadlarni ko‘zlagan holda tuzilgan haqiqatga mos bo‘lmagan, asossiz va noxolis hisobot sifatida qaraydi”, deb aytdi Qosimiy.
Uning aytishicha, Vashington undan ko‘ra AQShda diniy erkinlikni, ayniqsa musulmonlarga nisbatan, ta'minlash haqida qayg‘urishi zarur.
“Shu ayon bo‘lmoqdaki, diniy va irqiy tahqirlash, islomofobiya va ksenofobiya amerikalik siyosatchilar o‘rtasida keng tarqalgan va tez-tez uchraydigan holat hisoblanadi”, deb qo‘shimcha qilgan Qosimiy.
O‘z navbatida, Xitoy tashqi ishlar vazirligi ushbu hisobotni noobektiv deb atagan va Xitoyda barcha din erkinligiga bir xilda rioya qilinishini ta'kidlab o‘tgan.
“Turli elat va dinlarga tegishli bo‘lgan barcha xitoyliklar din erkinligida tengdirlar. AQSh davlat departamentining bu hisoboti ushbu faktlarni inkor etmoqda”, deb aytgan matbuot anjumanda Xitoy tashqi ishlar vazirligi vakili Xua Chunin.
AQShning 2016 yil uchun tuzilgan bu hisobotida Eron hukumati “baxaizmga ergashuvchilar, nasroniylar va sunniylar hamda boshqa diniy ozchilik vakillarini taqib qilish, so‘roq qilish va hibsga olishni davom ettirmoqda”, deb aytilgan.
Bundan tashqari, Vashingtonda Xitoyda turli diniy oqimlar vakillariga nisbatan jismoniy kuch va qiynoqlar qo‘llangan deb hisoblanmoqda.
