Samarqandda viloyat ahli bilan mustaqillik tantanalari nishonlandi

Samarqand shahridagi Alisher Navoiy nomidagi markaziy istirohat bog‘ida mustaqilligimizning 26 yilligiga bag‘ishlangan, «Fidoying bo‘lgaymiz sening, O‘zbekiston!» shiori ostida bayram tadbiri bo‘lib o‘tdi. Bayramga viloyat tashkilot va korxonalari, oliy o‘quv yurtlaridan talabalar va o‘qituvchilar va viloyat mehmonlari qatnashishdi.

Viloyat hokimi Turobjon Jo‘rayev tadbirni kirish nutqi bilan ochar ekan, mustaqillik yillarida Samarqandda amalga oshirilgan bunyodkorlik ishlariga e'tibor qaratdi. Kuni-kecha Samarqandda yakunlangan «Sharq taronalari» xalqaro XI musiqa festivali, uning ochilish marosimida nutq so‘zlagan Prezidentimiz Sh.Mirziyoyevning so‘zlaridan iqtibos keltirar ekan, qadimiy tarixga ega bo‘lgan Samarqandning kundan kunga chin ma'noda sharq gavhariga aylanib borayotgani, viloyatda amalga oshirilishi rejalashtirilgan ishlar haqida so‘zlab berdi.

O‘zbekiston Respublikasi madhiyasi yangrab, so‘ngra sahnaga samarqandlik taniqli xonandalar, raqqosalar chiqib kelib, bayramning madaniy qismi boshlandi. Sahnada kuylagan va raqsga tushgan bolajonlar, shuningdek, Samarqand oliy harbiy bilim yurti kursantlarining chiqishi bayramga o‘zgacha fayz bag‘ishladi.

Poytaxtdan tashrif buyurgan taniqli san'atkorlarning va raqs guruhlarining chiqishi bayramga yig‘ilganlarga xush kayfiyat ulashdi. Bayram tadbirlari mushakbozlik bilan yakunlandi.