Merkel: Shimoliy Koreya bilan bog‘liq nizoga harbiy aralashuv fojiaga olib keladi

Shimoliy Koreya bilan bog‘liq nizoga har qanday harbiy aralashuv fojiaga olib keladi. Bu muammoni diplomatik yo‘llar bilangina hal qilish kerak, deb aytdi Germaniya kansleri va XDI/XSI partiyalari alyansi yetakchisi Angela Merkel. U bu haqda Myunxenda saylovoldi kampaniyasining yakunlovchi saylovoldi namoyishida aytib o‘tdi.

"Men hamisha Germaniyani imkoni bor joyda diplomatik yechimni qo‘llab-quvvatlashiga chaqiraman. Men Shimoliy Koreya diktatorining yadroviy sinovlarini nazarda tutmoqdaman. Men bu nizo diplomatik yo‘l bilan hal qilinishini qo‘llab-quvvatlayman, unga har qanday harbiy aralashuv fojiaga olib keladi", deb aytgan Merkel.

Merkelning aytishicha, uning alyansi saylovlarda g‘alaba qozonsa, u Shimoliy Koreya atrofidagi vaziyat bo‘yicha muzokaralarni boshlash va "dunyoni barqarorroq qilish" uchun barcha sa'y-harakatlarni amalga oshiradi.

Germaniya parlamentiga saylovlar 24 sentabrda bo‘lib o‘tadi. Ijtimoiy so‘rovnomalar ma'lumotlariga ko‘ra, Merkel alyansi ishonchli tarzda yetakchilik qilmoqda.