Suriya va Eron harbiy sohada memorandum imzoladi 

Suriya va Eron armiyasi bosh shtablari boshliqlari, generallar Ali Ayub va Muhammad Bokiriy ikki davlat qurolli kuchlari o‘rtasida o‘zaro harakatlar va harbiy-texnik hamkorlikni yanada rivojlantirish haqidagi memorandumni imzolashdi. Bu haqda Suriyaning SANA axborot agentligi xabar bermoqda. 

Hujjat "ikki do‘stona armiyaning harbiy tayyorgarlik sohasidagi hamkorligini kengaytirish, qurolli kuchlarning terrorchilikka va AQSh-Isroilning Yaqin Sharqdagi rejalariga qarshi jangovar qobiliyatini oshirish uchun jangovar tajriba, zamonaviy texnologiyalar va razvedka ma'lumotlari bilan almashish"ni nazarda tutadi. 

Eron generali Damashqqa tashrifi vaqtida (18-21 oktabr) Suriya prezidenti Bashar Asad tomondan qabul qilingan. U Asadga Eron oliy rahbari oyatulloh Ali Hameneiyning nomasini yetkazgan. Oyatulloh nomada Suriya prezidenti va uning xalqini terrorchilikka qarshi kurashdagi g‘alabalari bilan muborakbod etgan.