Bokuda sakkiz nafar Rossiya fuqarosi qamoq jazosiga hukm qilindi

Ozarboyjon poytaxti Bokuda sud sakkiz nafar Rossiya fuqarosini narkotiklar tranziti, ularni tarqatish va kiberfiribgarlik bilan bog‘liq ayblovlar bo‘yicha turli muddatlarga ozodlikdan mahrum qildi. Hukm Rossiya va Ozarboyjon o‘rtasidagi munosabatlar taranglashgan bir paytda chiqarildi.

Foto: svtv.org

OAV ma’lumotlariga ko‘ra, sud qarori bilan Sergey Sofronov, Anton Drachev, Dmitriy Bezugliy va Valeriy Dulov har biri to‘rt yildan ozodlikdan mahrum etildi. Dmitriy Fyodorov, Boris Timoshov, Aleksey Vasilchenko va Ilya Bezugliy esa uch yillik qamoq jazosiga hukm qilindi.

Mahkumlar Erondan narkotik moddalarni tranzit qilish va tarqatish, shuningdek, kiberfiribgarlik jinoyatlarini sodir etishda ayblangan.

Mahkumlardan birining qarindoshi ma’lum qilishicha, bu birinchi instansiya sudining qarori hisoblanadi va hozircha himoya tomonining keyingi harakatlari bo‘yicha aniq qaror qabul qilinmagan.

Uning so‘zlariga ko‘ra, mahkumlar hukm ustidan shikoyat qilish imkoniyatini ko‘rib chiqmoqda. Biroq apellyatsiya berish jarayoni ishni yanada cho‘zishi mumkinligi ham qayd etilgan.

“Agenstvo” nashrining yozishicha, ayrim ayblanuvchilar o‘zlariga va yaqinlariga nisbatan tahdidlar bo‘lganini bildirib, narkotik vositalarni sotib olganlik haqida yolg‘on ko‘rsatmalar berishga majburlanganini aytgan. Bu iddaolar bo‘yicha rasmiy tasdiq berilmagan.

Rossiyaliklar ustidan sud jarayoni 2026 yil 3 apreldan buyon davom etib kelayotgan edi. Ilk hukmlar aprel oyida chiqarilgan. Xususan, Yekaterinburgda tug‘ilgan Aleksandr Vaysero jinoiy yo‘l bilan olingan mablag‘larni legallashtirish aybi bilan to‘rt yilga qamalgan. May oyida esa rossiyaliklar Igor Zabolotskix va Ilnur Valitov uch yildan ozodlikdan mahrum etilgan.

Kuzatuvchilar mazkur ishlarni Rossiya va Ozarboyjon o‘rtasidagi munosabatlarda yuzaga kelgan navbatdagi taranglik fonida baholamoqda.

Ikki davlat o‘rtasidagi diplomatik inqiroz 2024 yil dekabrida AZAL aviakompaniyasi samolyoti halokatidan keyin boshlangan. Vaziyat 2025 yil yozida Yekaterinburg shahrida Ozarboyjon diasporasi vakillarining ommaviy ravishda hibsga olinishi ortidan yanada keskinlashgan.

O‘sha vaqtda hibsga olingan aka-uka Huseyn va Ziyoddin Safarovlar qamoqda vafot etgan. Ozarboyjon Bosh prokuraturasi bu holat yuzasidan jinoyat ishi qo‘zg‘atib, ularning o‘limida Rossiya huquq-tartibot organlari xodimlarini ayblagan.

Keyinchalik Ozarboyjon sud-tibbiy ekspertizasi marhumlarda ko‘plab og‘ir tan jarohatlari aniqlanganini ma’lum qildi.

Shu bilan birga, 2026 yil aprel oyida Yekaterinburg sudi Uraldagi Ozarboyjon diasporasining sobiq rahbari Shahin Shixlinskini qotillik va boshqa jinoyatlar bo‘yicha aybdor deb topib, 24 yillik qamoq jazosiga hukm qilgan edi.

Tahlilchilar fikricha, Bokuda rossiyaliklarga nisbatan chiqarilgan so‘nggi hukmlar ikki davlat o‘rtasidagi munosabatlardagi murakkab vaziyatni yana bir bor namoyon qildi.