Iroqda IShIDning oxirgi tayanch nuqtalariga hujum boshlandi

Iroq bosh vaziri Haydar al-Obodiy Rava va Al-Qaym shaharlarini IShIDdan ozod qilish uchun harbiy harakatlarni boshlashga buyruq berdi. Bu haqda kurdlarning Rudaw telekanali xabar tarqatdi.

Frans Press agentligi xabariga ko‘ra, ushbu shaharchalar IShID jangarilarining Iroq hududidagi oxirgi tayanch nuqtalari hisoblanadi.

Al-Obodiy bundan avvalroq Anbar viloyati g‘arbidagi hududlar va Kirkuk shimolidagi Al-Xavija shahri jangarilardan to‘la ozod qilingani haqida ma'lum qilgandi.

Shuningdek, AQSh boshchiligidagi harbiy koalitsiya IShID poytaxti hisoblangan Raqqa shahri ham jangarilardan tozalangani haqida e'lon qildi.

Qayd etilishicha, Iroqdagi Mo‘sul va Suriyadagi Raqqa shaharlarini yo‘qotish orqali IShID to‘la mag‘lubiyatga uchradi.