Toshkentdagi mahallada bir guruh harbiy xizmatchilar faollar va yoshlar bilan uchrashdi

Toshkent shahri Uchtepa tumani Abdulla Qodiriy nomli mahalla fuqarolar yig‘inida bir guruh harbiy xizmatchilarning mahalla faollari va o‘quvchi yoshlar bilan uchrashuvi bo‘lib o‘tdi. “Vatanparvarlik – mahalladan boshlanadi” nomli tadbirda harbiy xizmatchilar va faxriylar mamlakatimizda harbiy sohada erishilayotgan yutuqlar, kiritilayotgan o‘zgarishlar va yaratilayotgan sharoitlar haqida keng tushunchalar berdilar, deb xabar qilmoqda Mudofaa vazirligi matbuot xizmati.

Bunday tadbirlar bir tomondan Vatan himoyachilarining kayfiyatini, Qurolli Kuchlarda kechayotgan islohotlar, o‘zgarishlarga fuqarolarning munosabatini aniqlashga imkon berayotgan bo‘lsa, ikkinchi tomondan xalqimizning o‘z armiyasiga bo‘lgan e'tiborini aniqlashning muhim vositalaridan biriga aylandi. 

Tadbirda joriy yilda bo‘lib o‘tgan uchinchi Xalqaro armiya o‘yinlarining “Qo‘shin razvedkasi a'lochilari” tanlovida faxrli 3-o‘rinni, yaqindagina Buyuk Britaniyada qo‘shin razvedkachilari o‘rtasida bo‘lib o‘tgan “Kembriya patruli” xalqaro tanlovida 2-o‘rinni olib qaytgan Mudofaa vazirligi harbiy xizmatchilari o‘z yutuqlari haqida gapirib berishdi. Yoshlarni qiziqtirgan savollarga to‘laqonli javob qaytarildi.

Tadbirda Mudofaa vazirligi mas'ul ofitserlari polkovnik Maqsud Abilov, podpolkovnik Alisher Shirinov, Qurolli Kuchlar faxriysi Odiljon Rajabov, mahalla yig‘ini raisi Liliya To‘raxodjayevalar so‘zga chiqdi.

O‘zbekiston Respublikasi Qurolli Kuchlar Markaziy ashula va raqs ansambli jamoasi yakkaxon xonandalarining ijrosidagi vatanparvarlik mavzusidagi kuy va qo‘shiqlar tadbirga yanada fayz bag‘ishladi.