Energiya samarador texnologiyalar Toshkent ko‘chalarini yoritishga 2018 yil oxirigacha joriy etiladi

Prezidentning 21.11.2017 yildagi PQ–3399-son qarori bilan Islom taraqqiyot banki ishtirokidagi «Toshkent shahri ko‘chalarini yoritish tizimida energiyadan samarali foydalaniladigan texnologiyalarni joriy etish» loyihasi muddatlariga tuzatishlar kiritildi.

Norma.uz’ning xabar berishicha, shahar bo‘yicha 1 546 dona elektr ta'minoti shkaflari va 116 083 dona simobli yoritish asboblari almashtiriladi. Ularning o‘rniga nurdiodli yoritgichlar o‘rnatiladi.

Loyiha bo‘yicha pudratchi etib «Toshelectroapparat» MChJ XK tasdiqlangan. U tomondan olib kelinadigan, 1.01.2019 yilgacha bojxona to‘lovlaridan ozod etilgan (bojxona yig‘imlaridan tashqari) xom ashyo, material va butlovchi buyumlar, asbob-uskunalar, texnologik jihozlar ro‘yxati tasdiqlandi.

Eslatib o‘tamiz, mazkur bojxona imtiyozlari prezidentning 28.11.2013 yildagi PQ–2078-son qarori bilan taqdim etilgan.