2025 yil noyabrida Toshkent shahridagi ikkita onkologik shifoxona bo‘shatilgan va u yerda ishlaydigan xodimlar hamda bemorlar bundan norozi bo‘lishgan edi. Ular bu navbatdagi biznes reja bo‘lishi mumkinligidan xavotir bildirishgandi.
Kun.uz o‘sha bo‘shatilgan shifoxonalarda bo‘lib, vaziyatni o‘rgandi. Savollarimizga poytaxt hokimligidan javob olishning imkoni bo‘lmadi.
Sobiq Respublika onkologiya markazi
Ma’lum bo‘lishicha, sobiq Respublika ixtisoslashtirilgan onkologiya va radiologiya ilmiy-amaliy tibbiyot markazi hududi o‘rab olingan. Ichkaridagi daraxtlarning bir qismi quriy boshlagan.
Joriy yil 16 fevral kuni imzolangan prezident qaroriga asosan, Shayxontohur tumani Forobiy ko‘chasida, 9,4 gektar maydonda joylashgan ushbu yashil hudud va bino-inshootlar negizida Kreativ industriya parki davlat-xususiy sheriklik asosida tashkil etilishi belgilangan.
Loyiha 2026-2027 yillarda amalga oshirilishi, yakunda Kreativ park hududi 24/7 rejimda faoliyat yuritadigan ochiq jamoat makoniga aylanishi kerak.
Kreativ park – sayr qilish uchun mo‘ljallangan va art-obektlardan iborat yashil bog‘, raqamli dizayn va dasturlash yo‘nalishida xalqaro maktab; buk-kafe; sport va vorkaut maydonchalari; mehmonxona; kovorking markazi; badiiy ijodkorlar paviloni; kreativ ustaxonalar; kino va videomahsulotlarni ishlab chiqarish zonalaridan iborat bo‘lishi ko‘zda tutilgan.
Toshkent shahar onkologiya shifoxonasi
Sobiq Respublika onkologiya markazining Toshkent shahar filiali ham qarovsiz yotganiga guvoh bo‘ldik. Bu yerning atrofi o‘rab olinmagan, shuningdek, quriyotgan daraxtlarni uchratmadik.
“Toza havo” umummilliy loyihasini amalga oshirish yuzasidan joriy yil 25 mart kuni imzolangan prezident farmoniga asosan, Chilonzor tumani Lutfiy mahallasi Bog‘iston ko‘chasida joylashgan 4,36 gektarlik bu hududda yashil jamoat parki tashkil etilishi belgilangan.
Farmonda poytaxt hokimligi bu topshiriqni 2026 yil oxiriga qadar bajarishi kerakligi ko‘rsatilgan. Ammo, aftidan, ishlar hali boshlanmagan, vaholanki, qulay va zamonaviy yashil makonlar aholiga aynan hozir – jazirama yoz kunlarida kerak.
Daraxtlar masalasi e’tiborsiz qolmasligi kerak
Bu ikkita shifoxona hududida jami 1500 dan ziyod daraxt bo‘lib, ular orasida Qizil kitobga kiritilganlari ham, qimmatbaho navlarga kiradigan daraxt turlari ham bor.
2025 yil oxirida ekologiya inspektorlari ikkala hududdagi barcha daraxtlarni xatlovdan o‘tkazishgan edi. Biroq ekologiya organi xatlov bilan cheklanib qolmay, holat monitoringini ham ta’minlashi maqsadga muvofiq.
Ayniqsa Kreativ park hududida binolarni demontaj qilish va kapital qurilish ishlari bo‘lishi ehtimoli inobatga olinsa, bu ishlar davomida daraxtlarga ziyon yetkazilishining oldini olish talab etiladi.
Eslatib o‘tamiz, bu ikkita shifoxona hududi 2022 yilda auksionga qo‘yilib, aholi noroziligidan keyin sotuv jarayoni to‘xtatilgan edi.
