Ispaniyada banan ortilgan konteynerlarda 250 mln dollarlik giyohvand modda aniqlandi 

Ispaniya huquq-tartibot idoralari Alxesiras shahrida deyarli 6 tonna kokain aniqlashdi. Bu haqda Ispaniya ichki ishlar vaziri Xuan Ignasio Zoido tvitterda ma'lum qildi.

“Alxesirasda deyarli 6 tonna kokain musodara qilindi. Kokain partiyasining bozor qiymati 210 mln yevroni tashkil qiladi”, deb ma'lum qilgan Zoido. Bu qiymat 250 mln dollarga teng.

Kokain Ispaniyaga Kolumbiyadan banan ortilgan konteynerlarda keltirilgan. Kokainni aniqlash bo‘yicha operatsiya Ispaniya milliy gvardiyasi va bojxona xizmati bilan birgalikda o‘tkazilgan.

Reuters axborot agentligining ma'lum qilishicha, aniqlangan kokain partiyasi Ispaniyada oxirgi 18 yil ichida ushlangan eng yirigi bo‘ldi. Giyohvand modda 1 kg dan qilib briket ko‘rinishida qadoqlangan va ustiga yetkazilishi kerak bo‘lgan joyni bildiruvchi belgilar qo‘yilgan bo‘lgan.  

Ma'lum qilinishicha, ushbu hodisa yuzasidan 3 kishi, jumladan konteynerlarga egalik qiluvchi transport kompaniyasi rahbari hibsga olingan. Ta'kidlanishicha, yana bir necha hibsga olishlar amalga oshirilishi mumkin.