Кейн Ширернинг рекордини такрорлади ва жамоасига йирик ғалаба келтирди
09:00 / 24.12.2017
6153

Англия Премьер-лигасининг 19-турида «Тоттенҳэм Ҳотспур» «Бёрнли» майдонига сафар қилиб, йирик ҳисобда ғалабага эришди — 3:0.

«Шпорлар» 7-дақиқада ҳисобни очишди, Ҳарри Кейн пенальтини аниқ амалга оширди. Мезбонлар дарвозасига иккинчи гол 69-дақиқада урилди — Кейн дублни расмийлаштирди. 10 дақиқа ўтиб эса Кейн ҳет-трик қайд этиб, якуний ҳисобни ўрнатди.

Бу голлар ушбу ёш ҳужумчига Алан Ширернинг рекордини такрорлаш имконини берди.

24 ёшли форвард учун ўйиндаги учинчи гол 2017 йилда Англия чемпионати ўйинларида урилган 36-гол бўлди. Кейн бу орқали англиялик собиқ ҳужумчи Алан Ширер томонидан ўрнатилган рекордни такрорлади.

Ширер 1995 йил давомида «Блэкберн Роверс»нинг Англия чемпионатидаги ўйинларида 36 гол урганди. Кейнда бу натижани янгилаш имконияти мавжуд, 2017 йил охиригача «Тоттенҳэм» яна бир учрашув ўтказади (26 декабрь куни «Саутҳэмптон»га қарши).

Эндиликда Кейн ҳисобида 2017 йили барча турнирлар доирасида (терма жамоа ҳам) урилган 53 гол мавжуд. Ундан кўпроқ голни фақат «Барселона» ҳужумчиси Лионель Месси урган — 54.

Ушбу ғалабадан кейин турнир жадвалида «Тоттенҳэм» 34 очко билан бешинчи ўринда, еттинчи ўриндаги «Бёрнли» ҳисобида эса 32 очко мавжуд.

Англия чемпионати
19-тур

Бёрнли – Тоттенҳэм 0:3 (0:1, 0:2)
Голлар: 0:1 – 7, пенальти Кейн, 0:2 – 69 Кейн, 0:3 – 79 Кейн.
Бёрнли – Поуп, Бардсли, Лонг, Ми, Тэйлор, Гудмундссон, Дефур, Корк, Арфилд (Уэллс, 86), Хендрик (Воукс, 71), Вуд (Барнс, 35).
Тоттенҳэм – Льорис, Орье, Санчес, Вертонген, Дэвис, Сиссоко, Дайер (Ламела, 83), Эриксен, Алли (Льоренте, 87), Сон Хин Мин (Дембеле, 78), Кейн.
Огоҳлантиришлар: Алли (4), Сиссоко (57), Дефур (88).


Улашинг
Top