«Atletiko» 5 ta, «Bavariya» 6 ta gol urdi. YeChLda kun o‘yinlari

Seshanba oqshomida Chempionlar ligasida 1/8 finalning dastlabki uchrashuvlari o‘tkazildi. Ikki o‘yinda yirik hisoblar qayd etildi, yana ikkitasida favoritlar g‘alaba qozona olmadi.

«Liverpul»ning Istanbulga safari yana muvaffaqiyatsiz kechdi

«Galatasaroy» – «Liverpul» 1:0
Gol: Lemina, 7 (1:0)
«Galatasaroy»: Ugurjan Chaqir, Sanches, Abdulkarim Bardakchi, Yakobs, Singo, Torreyra (Eren Elmali, 90+3), Lemina (Sholloi, 77), Sara (Boe, 87), Lang (Yunus Oqkun, 77), Barish Yilmaz (Gundo‘g‘an, 90+3), Osimhen
«Liverpul»: Mamardashvili, van Deyk, Konate, Kerkez (Roberson, 60), Gomes, Makallister, Gravenberh, Soboslai, Virs (Gakpo, 73), Saloh (Frimpong, 60), Ekitike
Ogohlantirishlar: Sanches, 90 – Kerkez, 33. van Deyk, 55. Gravenberh, 88. Soboslai, 90

2025 yil sentabrida «Liverpul» YeChL umumiy guruh bosqichi doirasida ham Istanbulda «Galatasaroy»ga qarshi o‘ynagan va yutqazgandi (0:1). Yarim yilga yaqin vaqt o‘tib inglizlar klubi yana Turkiyada mehmon bo‘ldi – bu safar klublar 1/8 finalda to‘qnashdi. Va tabloda yana shu raqam aks etdi. Mezbonlar yettinchi daqiqadayoq hisobni ochishdi. Viktor Osimhen to‘pni olis ustun tomon yetkazdi, u yerda qo‘riqchisiz qolgan Mario Lemina osonlik bilan darvoza to‘rini ishg‘ol etdi. Bo‘limning qolgan qismida ikki jamoada ham yaxshi vaziyatlar bo‘ldi, ammo hisob o‘zgarishsiz qoldi.

Tanaffusdan keyin jamoalar bittadan gol urishdi, ammo bu gollar inobatga olinmadi. Ibraima Konatening xatosidan keyin Osimhen mezbonlarning ikkinchi golini urgandi, ammo hujum davomida Barish Alper Yilmaz «o‘yindan tashqari holatda» qolgani ma’lum bo‘ldi. Keyinroq bosh hakam «Liverpul»ning golini ham bekor qildi, videotakror hujum vaqtida to‘p qo‘l bilan o‘ynalganini ko‘rsatdi. Keyinroq Ekitike yakkama-yakka vaziyatdan foydalana olmadi va mezbonlar g‘alabali hisobni saqlab qolishdi. Bu natija ikki jamoada ham chorakfinalga chiqish uchun imkon qoldirmoqda. Ammo «Galatasaroy»ga «Enfild»dagi javob o‘yini oson bo‘lmasligi tayin.

Madridda drama – uchta gol o‘tkazib yuborgan darvozabon 17-daqiqadayoq almashtirildi

«Atletiko» – «Tottenhem» 5:2
Gollar: Liorente, 6 (1:0). Grizmann, 14 (2:0). Alvares, 15 (3:0). Le Norman, 22 (4:0). Porro, 26 (4:1). Alvares, 55 (5:1). Solanke, 76 (5:2)
«Atletiko»: Oblak, Gansko, Le Norman, Rudjyeri, Pubil, Kardozo, Liorente (Barrios, 69), Lukman (Syorlot, 69), Simeone, Grizmann (Koke, 81), Alvares (Gonsales, 73)
«Tottenhem»: Kinski (Vikario, 17), Romero, van de Ven, Danso, Grey, Sarr, Spens (Simons, 83), Porro, Tel (Gallaher, 46), Kolo Muani (Solanke, 46), Risharlison (Palinya, 68)
Ogohlantirishlar: Spens, 4. Risharlison, 60. Grey, 62. Danso, 80. Romero, 85

Gulelmo Vikario – anchadan buyon «Tottenhem»ning asosiy darvozaboni hisoblanadi. Ammo londonliklarning yangi bosh murabbiyi Igor Tyudor kutilmagan yurish amalga oshirishga qaror qildi. U Madriddagi safar o‘yinida Vikarioni zaxirada qoldirdi va Antonin Kinskini boshlang‘ich tarkibga kiritdi. Bu esa juda xato qaror bo‘lib chiqdi. Chexiyalik darvozabon 2025 yil oktyabridan buyon o‘ynamagandi – o‘shanda u Angliiya ligasi 1/8 finalida «Nyukasl»ga qarshi o‘yinda maydonga tushgandi.

Madridda esa mehmonlar 15-daqiqagacha 3 ta gol o‘tkazib yuborishdi. Shundan ikki gol – Kinskining yaqqol xatolari tufayli urildi. Avvaliga himoyadan chiqishda 22 yoshli darvozabon toyib ketdi va to‘pni raqibga topshirdi.

«Atletiko» bunday sovg‘adan foydalandi – Alvares Markos Liorenteni zarbdor pozitsiyaga chiqardi, u esa quyi burchakni aniq nishonga oldi.

Biroz o‘tib jamoa yetakchilaridan biri Mikki van de Ven ham oddiy vaziyatda gazonga yiqildi va Antuan Grizmann osonlik bilan ikkinchi golni urish imkoniga ega bo‘ldi.

Katta futbolda so‘nggi mavsumini o‘tkazayotgan fransuz hujumchisi barchasini aniq ijro etdi – u zarba berishdan oldin biroz pauza ushladi va to‘pni darvozabonning oyog‘i yonidan o‘tkazdi. Mehmonlar shunchaki oyog‘ida tura olmagani uchun ikki gol o‘tkazib yuborishdi. Ammo bu hali hammasi emasdi.

Ko‘p o‘tmay Antonin xatosini takrorladi. U raqib futbolchisi Xulian Alvaresni bo‘sh darvoza qarshisiga chiqarib yubordi – argentinalik hujumchi to‘pni shunchaki darvoza to‘riga yumalatib yubordi.

Tyudor shundan keyingina xatosini anglab yetdi va Kinskini o‘yindan olib, Vikarioni darvozaga qaytardi.

Og‘ir zarbaga uchragan chexiyalik darvozabon ko‘zda yosh bilan kiyim almashtirish xonasiga yo‘l oldi.

Mezbonlar uchun esa bu oqshom darvozada kim turishining ahamiyati yo‘q edi. Besh daqiqa o‘tib Roben Le Norman to‘rtinchi golni urdi. Ammo mehmonlar tezda javob qaytarishdi. Qanot himoyachisi Pedro Porro hujumchi pozitsiyasiga chiqib borib, Yan Oblak darvozasini ishg‘ol etdi, shundan keyin «Tottenhem» tashabbusni qo‘lga oldi va bir necha vaziyatlarga ega bo‘ldi.

Quvnoq o‘yin ikkinchi bo‘limda ham davom etdi. Avvaliga Alvares dublni rasmiylashtirdi, keyin esa Oblak ham «qovun tushirdi». Mehmonlar vaziyatdan foydalandi – Dominik Solanke hisobdagi farqni biroz qisqartirdi.

O‘yin oxirida mehmonlar uchun yana bir ko‘ngilsiz holat yuz berdi – «Tottenhem»ning ikki futbolchisi – Kristian Romero va Palinya to‘qnashib ketdi. Portugaliyalik futbolchi anchagacha gazondan ko‘tarila olmadi va uning boshini bog‘lab qo‘yishga to‘g‘ri keldi. Romero o‘yinni davom ettirdi, ammo hakam hushtagi chalinishidan biroz oldinroq baribir maydonni tark etishga majbur bo‘ldi.

«Bavariya» o‘yinida tennischa hisob

«Atalanta» – «Bavariya» 1:6
Gollar: Stanishich, 12 (0:1). Olise, 22 (0:2). Gnabri, 25 (0:3). Jyekson, 52 (0:4). Olise, 64 (0:5). Musiala, 67 (0:6). Pashalich, 90+3 (1:6)
«Atalanta»: Karnesekki, Xin, Kolashinats (Axanor, 55), Bernaskoni, Dzappakosta (Bellanova, 67), Pashalich, de Ron, Zalevski (Musa, 55), Sulemana (Samarjich, 73), Skamakka (Jimsiti, 46), Krstovich
«Bavariya»: Urbig, Upamekano, Ta, Laymer (Deyvis, 46, Bishof, 71), Stanishich (Rafael Gerreyru, 86), Kimmih, Pavlovich (Goretska, 68), Gnabri (Musiala, 46), Dias, Olise, Jyekson
Ogohlantirishlar: Musa, 83 – Laymer, 39. Olise, 77. Kimmih, 84

«Atalanta» navbatdagi bosqichda ham nemis klubiga ro‘para bo‘ldi. O‘tish bosqichida bergamoliklar «Borussiya»ga qarshi Dortmundda kechgan birinchi o‘yinda 0:2 hisobida yutqazgan, ammo o‘z uyida kambek amalga oshirgandi. Ammo hozirgi «Bavariya» – turnir g‘olibligi uchun asosiy favoritlardan biri. Birinchi o‘yindayoq ushbu juftlik taqdiriga oydinlik kiritildi – myunxenliklar klubini chorakfinalga chiqqani bilan tabriklash mumkin.

«Bavariya»ning asosiy darvozaboni Manuel Noyyer va asosiy hujumchisi Harri Keyn bu o‘yinda ishtirok eta olmadi, ammo jamoaga ularning yo‘qligi umuman sezilmadi. Birinchi bo‘limdayoq 0:3 hisobi – «Atalanta» uchun jiddiy zarba bo‘ldi. Mavsumning birinchi qismida standart vaziyatlar eng ojiz nuqtasi sifatida qaralgan «Bavariya» bu kamchilikni tuzatish ustida ishlamoqda va Bergamodagi o‘yinda aynan burchak zarbasi orqali hisobni ochdi: 12-daqiqada Yosip Stanishich Serj Gnabrining qanotdan uzatmasini golga aylantirdi. Tanaffusgacha Maykl Olise va Gnabri ham bittadan gol urishdi, ikkinchi bo‘lim boshida esa Nikolas Jyekson ham o‘z nomini tabloga yozdirib qo‘ydi, keyinroq Olise tanaffusda o‘yinga qo‘shilgan Alfonso Deyvisning uzatmasidan keyin dublni rasmiylashtirdi, zaxiradan maydonga tushgan boshqa bir futbolchi Musiala esa oltinchi golga mualliflik qildi.

Shu bilan birga, bu yirik g‘alaba nemislar jamoasi muxlislariga unchalik tatimadi: avvaliga jarohatidan endigina tuzalib safga qaytgan Deyvis yana jiddiy jarohat olib, maydonni ko‘zda yosh bilan tark etdi. O‘yin oxirida esa avvaliga Musiala, keyin esa jarohatdagi Noyyer o‘rniga darvozani qo‘riqlayotgan Urbig ham mehmonlarning yagona javob goli urilgan vaziyatda jarohat oldi.

«Barsa»ga penalti yordam berdi

«Nyukasl Yunayted» – «Barselona»
Gollar: Barns, 86 (1:0). Yamal, 90+6 – penalti (1:1)
«Nyukasl Yunayted»: Ramsdeyl, Tiau, Byorn, Holl, Trippiyer (Livramento, 67), Tonali, Joelinton, Remsi, Barns (Uillok, 90), Elanga (Gordon, 67), Osula (Myorfi, 67)
«Barselona»: Garsiya, Kubarsi, Martin, Joau Kanselu, Arauxo (Espart, 88), Pedri (Olmo, 70), Bernal (Kasado, 73), Fermin Lopes (Torres, 88), Rafinya, Yamal, Levandovski (Reshford, 70)
Ogohlantirishlar: Tonali, 34. Uillok, 90 – Joau Kanselu, 68

«Nyukasl» guruh bosqichidagi o‘yinda bo‘lgani kabi bu safar ham kuchli pressing uyushtirdi, ammo vaziyatlaridan foydalana olmadi. Ikkinchi bo‘limda ham manzara o‘zgarmadi: mezbonlar faolroq harakat qilishdi va ko‘proq vaziyatlar yaratishdi. Bu zarbalar statistikasida ham aks etdi – 11:4.

75-daqiqada inglizlar nihoyat darvozani ishg‘ol etishdi, ammo «Sent-Jyeyms Park» stadionida yig‘ilgan muxlislarning quvonchi uzoqqa cho‘zilmadi: Harvi Barnsning zarbasidan keyin to‘p ustundan qaytdi va Joelinton darvozani ishg‘ol etdi, ammo u zarba ijro etilayotgan chog‘da ofsaydda qolgani ma’lum bo‘ldi. «Nyukasl» 86-daqiqada baribir o‘z maqsadiga erishdi. Bu safar Harvi Barnsning zarbasidan keyin to‘p rikoshet bo‘lib, darvoza to‘riga borib tushdi.

«Nyukasl» g‘alabaga juda yaqin edi, ammo o‘yinga qo‘shib berilgan daqiqalarda Malik Tiau jarima maydoni ichida Dani Olmoning oyog‘ini bosib oldi.

Lamin Yamal esa bu vaziyat uchun belgilangan penaltini aniq ijro etdi. «Nyukasl» g‘alabaga haqli o‘ynagan bo‘lsa-da, «Barsa» safardan muhim durang bilan qaytadigan bo‘ldi.