Amerika Qo‘shma Shtatlarining Atlantika okeani sohillari uchun dekabr oxiri va yanvar oyi boshi juda qorli hamda sovuq keldi. Mamlakatning ba'zi shtatlarida qor yog‘ishi hamon davom etmoqda.
Jon Kennedi nomidagi Nyu-York xalqaro aeroporti ko‘rish masofasi pasaygani va kuchli qor tufayli o‘z ishini vaqtinchalik to‘xtatdi, megapolisdagi maktablarda esa mashg‘ulotlar bekor qilindi.
3 yanvar kuni 29 yil ichida birinchi marta Florida shtati shimolidagi Tallaxassida qor yog‘di. Shtatning ba'zi maktab okruglari rahbariyati ta'tillarni davom ettirish haqida qaror qabul qildi, Orlandodagi suvli attraksionlarga ega maxsus bog‘lar vaqtinchalik yopib qo‘yildi.
AQSh poytaxti Vashingtonda sovuq harorat yanvar o‘rtalariga qadar saqlanib qoladi. Luiziana, Janubiy Karolina va Jorjiyada favvoralar ham muzlab qoldi.
