Toshkentda Shanhay Xalqaro biznes-maktabi ochiladi 

Toshkentda Shanhay Xalqaro biznes-maktabi ochiladi. Tegishli kelishuv Jahon iqtisodiyoti va diplomatiya universiteti rektori Abdumalik Jumanovning Xitoyga safari vaqtida imzolangan. Loyiha hamkori Shanhay universiteti (Shanghai University) hisoblanadi, deb xabar bermoqda “Jahon” axborot agentligi.  

Biznes-maktab Jahon iqtisodiyoti va diplomatiya universiteti tizimida tashkil etiladi. Ta'lim muassasasi Shanhay universiteti bakalavr va magistr darajasini olish imkonini beruvchi ta'lim dasturini taqdim qiladi. Biznes-maktabning yana bir vazifasi startaplarga ko‘mak ko‘rsatish maqsadida tadqiqotlar va biznes vakillari bilan maslahatlashuvlar o‘tkazish bo‘ladi. Biznes-maktabni yaratish haqidagi yakuniy kelishuvni 2018 yilning birinchi yarmida imzolash ko‘zda tutilgan.

Shuningdek, Shanhay xalqaro tadqiqotlar universitetida O‘zbekistonni o‘rganish markazini tuzish haqida kelishuvga erishilgan. Ushbu ta'lim maskani rahbariyati o‘zbekistonlik yosh olimlarga Xitoyda ta'lim olish uchun stipendiyalar taqdim qilish istagini bildirgan. O‘z navbatida Jahon iqtisodiyoti va diplomatiya universitetida Xitoy tadqiqotlari ilmiy laboratoriyasi ochiladi.