Ички бозорда нархлар кескин ошишининг олдини олиш учун комплекс Дастур қабул қилинади
03:17 / 10.01.2018
13115
Фото: KUN.UZ

2017–2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясини «Фаол тадбиркорлик, инновацион ғоялар ва технологияларни қўллаб-қувватлаш йили»да амалга оширишга оид давлат дастури лойиҳаси эълон қилинди.

Дастурнинг «Иқтисодиётни ривожлантириш ва либераллаштиришнинг устувор йўналишлари» деб номланган III боби, Макроиқтисодий барқарорликни мустаҳкамлаш ва юқори иқтисодий ўсиш суръатларини сақлаб қолишга бағишланган бўлимида 2018 йилда мамлакат ички бозорида истеъмол товарлари ва хизматлар бўйича нархларнинг кескин ошишининг олдини олиш учун амалга оширилиши мўлжалланаётган чора-тадбирлар белгилаб олинмоқда.

Бунинг учун комплекс чора-тадбирлар дастури қабул қилиниши кўзда тутилган. 2018 йил 20 мартгача қабул қилинадиган Дастурнинг ижроси учун Ижтимоий аҳамиятга эга озиқ-овқат товарларининг асосий турларига нарх-навони мониторинг ва назорат қилиш республика комиссияси, Иқтисодиёт вазирлиги, Марказий банк, Молия вазирлиги ва Давлат рақобат қўмитаси масъул қилиб белгиланган

Дастурни амалга ошириш учун Ички истеъмол бозорида нарх-навони барқарорлаштиришга кўмаклашиш жамғармаси маблағлари ҳисобидан 100 миллион АҚШ доллари ва 385 миллиард сўм сарфлаш назарда тутилган.

Дастурда:

  • ички истеъмол бозорига асосий озиқ-овқат ва бошқа истеъмол товарларининг узлуксиз етказиб берилишини таъминлаш;
  • истеъмол товарлари бўйича юзага келиши мумкин бўлган тақчилликни олдиндан аниқлаш ва бу бўйича тегишли чораларни кўриш;
  • хом-ашё ва истеъмол товарлари импорти бўйича эркин рақобатни таъминлаш;
  • мамлакат ички бозорида рақобат муҳитини жонлантириб бориш ва сунъий равишда яратилиши мумкин бўлган тақчилликларнинг олдини олиш каби чора-тадбирлар назарда тутилади.

Улашинг
Top