IIV ham «Qamchiq» dovoni bo‘yicha murojaat bilan chiqdi 

Gidrometeorologiya xizmati markazining ma'lumotiga asosan joriy yilning 11,12 va 14 yanvar kunlari «Toshkent-O‘sh» avtomobil yo‘lining «Qamchiq» dovonidan o‘tgan qismida ob-havo sharoitining keskin o‘zgarishi, qor yog‘ishi, vaqti vaqti bilan kuchayishi, tuman tushib ko‘rinishning 50-100 metrgacha yomonlashishi, shamolning tezligi 22-25 m/sek.gacha kuchayishi, yo‘llarda qor uyumlarining yuzaga kelishi va muzlamalar hosil bo‘lishi kutilmoqda.

O‘zbekiston Respublikasi Ichki ishlar vazirligi Yo‘l harakati xavfsizligi bosh boshqarmasi ob-havo sharoitining keskin o‘zgarishi harakat qatnashchilari uchun bir qator noqulayliklar keltirib chiqarishi, yo‘l-transport hodisalari sodir etilishiga sabab bo‘lishi mumkinligini inobatga olgan holda, haydovchilardan, zarurat bo‘lmaganida, dovon yo‘lidan harakatlanmasliklarini, harakatlangan taqdirda murakkab ob-havo sharoitini hisobga olishlarini so‘ragan.

Eslatib o‘tamiz, avvalroq O‘zbekiston Respublikasi Favqulodda vaziyatlar vazirligi ham «Qamchiq» dovoni bo‘yicha tezkor xabarnoma e'lon qilgandi.