Qirg‘izistonda 2017 yil oltinchi chaqiriqdagi parlamentning besh deputati va ikki sudyaga nisbatan mamlakat JKning “Korrupsiya” moddasi bo‘yicha jinoiy ishlar qo‘zg‘atildi. Shuningdek, korrupsiya bo‘yicha ishlarga prokuraturaning bir xodimi, vazirlik va idoralarning to‘rt rahbari jalb etilishi mumkin. Bu haqda Qirg‘iziston Milliy xavfsizlik davlat qo‘mitasining Korrupsiyaga qarshi xizmati rahbari o‘rinbosari Tilak Cho‘kmorov xabar berdi.
Uning ma'lumotlariga ko‘ra, o‘tgan yilda korrupsiya bo‘yicha hammasi bo‘lib 210 ta jinoiy ish qo‘zg‘atilgan, 1 mlrd 448 mln somlik zarar yetkazilgan.
«210 ishdan 72 tasi xizmat mavqeini suiiste'mol qilish, 14 – pul talab qilish, 10 – bojxona va soliq to‘lovlaridan bo‘yin tovlash holatlariga tegishli», - deya qo‘shimcha qilib o‘tdi Tilak Cho‘kmorov.
Uning ta'kidlashicha, korrupsiya bilan kurash kuchaytirilganiga qaramay, qirg‘izistonliklar hamon davlat xizmatchilarining qonunga zid harakatlariga duch kelishmoqda.
