Hindiston 5 marta Agni-V qit'alararo ballistik raketasini sinovdan o‘tkazdi. Bu haqda The Times Of India nashri xabar bermoqda.
Raketa 18 yanvarda Hindiston yarimorolining sharqiy sohilidagi Abdul-Qalam orolidan uchirilgan. Sinov tafsilotlari ma'lum qilinmagan.
Uch pog‘onali raketa 5 ming km.dan ko‘proq masofaga yadroviy jangovar zaryadni tashishga qodir. Bu raketa Xitoyning shimoliy hududlarigacha yeta oladi. Raketaning bo‘yi 17 metrni, og‘irligi 50 tonnani tashkil qiladi.
Raketaning avvalgi sinovlari 2012 yil aprelda, 2013 yil sentabrda, 2015 yil yanvarda va 2016 yil dekabrda o‘tkazilgan.
Hindiston raketaning yana bir nechta sinovini o‘tkazmoqchi. Ushbu qurolning hind armiyasida joriy qilinishi Hindistonni AQSh, Rossiya, Xitoy, Fransiya va Buyuk Britaniyadan keyin o‘z ixtiyorida 5 ming km.dan uzoqroqqa ucha oladigan ballistik raketalarga ega 6-davlatga (yoki Shimoliy Koreyani hisobga olgan holda 7-davlatga) aylantiradi.
