Qozog‘iston IIV avtobus fojiasini baxtsiz hodisa sifatida baholamoqda

Qozog‘istonning Aqto‘be viloyatida ichida O‘zbekiston fuqarolari bo‘lgani taxmin qilinayotgan avtobusning yonib ketishi baxtsiz hodisa bo‘lgan. Bu haqda RIA «Novosti» respublika ichki ishlar vaziri o‘rinbosari Yerlan Turgumbayevning bayonotiga tayangan holda xabar bermoqda.

«Shuni alohida ta'kidlab o‘tish joizki, u yerda yo‘l-transport hodisasi ro‘y bermagan. Shu bilan birga, biz qandaydir jinoiy holatlarni ko‘rayotganimiz yo‘q, aftidan, baxtsiz hodisa yuz bergan. Bu omon qolganlarning ko‘rsatmalari bilan tasdiqlanmoqda, ularning bari yong‘in avtomashina salonida boshlanganini iddao etishmoqda», - deya aytib o‘tdi u.

Turgumbayev yong‘inga nima sabab bo‘lgani bugun, 19 yanvar kuni aniqlanishiga umid bildirdi.

Eslatib o‘tamiz, avvalroq Aqto‘beda halok bo‘lganlardan 30 nafarining shaxsi aniqlangani xabar berilgandi.