18 yanvar kuni Qozog‘istonning Aqto‘be oblastida Rossiyaga ketayotgan o‘zbekistonliklar mingan avtobus yonib ketdi. Hodisa oqibatida 52 nafar o‘zbekistonlik halok bo‘ldi.
18 yanvar kuni Qozog‘istonning Aqto‘be oblastida Rossiyaga ketayotgan o‘zbekistonliklar mingan avtobus yonib ketdi. Hodisa oqibatida 52 nafar o‘zbekistonlik halok bo‘ldi.
Mazkur fojiadan keyin ijtimoiy tarmoqlar motamga burkandi, barcha marhumlarning yaqinlariga hamdardlik bildirmoqda. Marhumlar xotirasiga marsiyalar, bag‘ishlovlar yozilmoqda.
- «52»!
Naqadar,
omadsiz sonsan,
Turishing eslatar qop-qora kulni.
Ayblama, ne qilay qiyshiq qomating,
Eslatib yuborsa qujragan gulni,
(Zor-zor yig‘layotgan 52 tulni.)
- «52»!
Qo‘rqaman,
sendan yomonam,
Endi darslardan ham ololmam «5»lar.
Qon kabi qizargan ruchka uchlari,
Yarador yurakka bigizin nishlar.
(Gullar bilan qolgan yetim g‘unchalar...
Bog‘boni yo‘q gulga qiyin bunchalar?!)
- Oh bolam, sen uchun nonlar yopolmam,
Olovda ko‘rinar kulgan surating.
Ketmasang bo‘lardi olis yurtlarga,
Yerda qolmas edi qora mehnating.
(O‘lgach qadring oshdi, topding izzating.
Uchoqlarda qaytding, «oshib hurmating»!)
Sochimda oq qirov, ichimda olov,
Hatto maza yo‘qdir tuzsiz oshimda.
Sen emas, men borsam bo‘lmasmi edi?
Tashlab ketding bolam ellik yoshimda,
(Yetim omonating qoldi boshimda.
O‘g‘ilchang o‘ynaydi qabr toshingda!)
Olam to‘lib ketdi ohu-nolamdan,
Robbim rozi bo‘lgin «mardkor» bolamdan!
Qozoqdashtda izg‘ir izg‘irin fasli,
Izlar isinmoqqa ajal ham o‘tin.
Ellik ikki jonning faryodi asli
Avtobusdan chiqqan qop qora tutun...
Butun bir umrni sharhlaydi bir zum
Dahshat ichra qotib qolganda ko‘zlar.
Olovlarga tomdi ko‘zyoshlar yum-yum,
Falakka sanchildi jizg‘onak so‘zlar.
Ortda qolgan yurtda chirqirar beshik,
Yig‘laydi kelinchak – bir yostig‘i bo‘sh...
Ingranar yo‘l qarab mung‘aygan eshik,
Ota yoqavayron,
Ona faromush...
Ne ko‘rgulik qilding, ey qattol dayr,
Hayot – o‘lim sari otilgan paykon.
O‘tda yonib ketgan orzular, xayr,
Xayr, O‘zbekiston,
Xayr, Namangon!..
