Yadro qurolini taqiqlash bo‘yicha xalqaro kampaniya Trampdan tashvishda

AQSh prezidenti Donald Tramp ma'muriyatining yadro quroli sohasidagi siyosati butun dunyoda tashvishga sabab bo‘lmoqda. Bu haqda Yadro qurolini taqiqlash bo‘yicha xalqaro kampaniya ijrochi direktori Beatris Fin ma'lum qildi.

«Bu siyosat yadro qurolidan foydalanish shartlarini yengillashtirish hamda uni ishlab chiqarishni kengaytirishga xizmat qilmoqda», - deya Finning so‘zlarini keltiradi Anadolu agentligi.

Uning ta'kidlashicha, Yadro qurolini taqiqlash bo‘yicha xalqaro kampaniya vakillari AQSh delegatsiyasiga Davosda bu masalani muhokama etishni taklif qilishgan, biroq javob olishmagan.

«Yadro quroli bor ekan, undan foydalanish tahdidi ham saqlanib qoladi», - deya qayd etib o‘tdi tashkilot rahbari.

Shu bilan birga, Finning ishonch bildirishicha, yadro quroli butun dunyoda yo‘q qilinadi.