Qozog‘istonda 18 yanvarda yonib ketishi oqibatida 52 o‘zbekistonlikning o‘limiga olib kelgan avtobusning haydovchilari ushlandi. Bu haqda fojia yuz bergan Aqto‘be viloyati prokuraturasi saytida ma'lum qilingan.
Prokuratura ma'lumotlariga ko‘ra, avtobusning yonishiga avtobus salonida isinish uchun qo‘llangan kavshar lampa sabab bo‘lgan. “Bu jinoyatga avtobusning barcha uch haydovchisining aloqadorligi o‘rnatildi”, deyilgan xabarda.
Ushbu jinoyat yuzasidan Qozog‘iston jinoyat kodeksining 345-moddasi 4-qismi (yo‘l harakati yoki transport vositalaridan foydalanish qoidalarini buzish) bo‘yicha jinoiy ish qo‘zg‘atilgan.
Ichida 57 kishi bo‘lgan avtobus Samara-Chimkent yo‘lida yonib ketgan. Yong‘in avtobus harakatlanayotgan vaqtda yuz bergan. Falokat oqibatida 52 kishi halok bo‘lgan, 5 kishi omon qolishga muvaffaq bo‘lgan.
