16:30 / 22.02.2018
10540

O‘zbekiston va Turkmaniston to‘g‘ridan-to‘g‘ri aviaqatnovni tiklashi mumkin

Foto: O‘zbekiston havo yo‘llari

O‘zbekiston va Turkmaniston joriy yilning mart oyida to‘g‘ridan-to‘g‘ri aviaqatnovni tiklashi mumkin. Bu haqda Turkmanistonning O‘zbekistondagi elchisi Shiri Shiriyev aytib o‘tgan.

Elchining eslatishicha, Shavkat Mirziyoyevning Turkmanistonga o‘tgan yil may oyida amalga oshirilgan tashrifi chog‘ida aviaqatnovni tiklash bo‘yicha kelishuvlar imzolangan edi.

"Hozirda biz Ashxobod-Toshkent birinchi to‘g‘ridan-to‘g‘ri reysini yo‘lga qo‘yish ustida ishlamoqdamiz. Dastlabki ma'lumotlarga ko‘ra, u haftasiga ikki martadan amalga oshiriladi. Start mart boshiga rejalashtirilgan. Birinchi bosqichda yo‘nalishga faqat "Turkman havo yo‘llari" xizmat ko‘rsatadi. Keyinchalik, vaziyatdan kelib chiqqan holda, reyslar soni oshirilishi mumkin, hamda parvozlarning bir qismi O‘zbekiston tomoniga o‘tadi", - deya aytib o‘tgan elchi.

Mamlakatlar o‘rtasidagi aviaqatnov 2013 yilning 2 may kuni xarajatlar qoplanmagani tufayli to‘xtatilgan. Parvozlar "O‘zbekiston havo yo‘llari" MAK tomonidan amalga oshirilgan.

Top