1998-2000 yillarda Islom Karimovning davlat maslahatchisi bo‘lib ishlagan va u kishini yaxshi tanigan Narzulla Jo‘rayev birinchi prezidentni xotirladi. Facebook'ning Islom Karimov fondi sahifasida u Islom Karimovni boshqa davlat rahbarlaridan ajratib turadigan xususiyatlariga to‘xtalib o‘tdi.
Uning so‘zlariga ko‘ra, birinchi prezident bilan muzokaraga kirishadigan odam oldindan tayyorlanib biror narsaga erisha olmasdi. Islom Karimovda prognozlar salohiyati shu qadar kuchli ediki, muayyan jarayonlarning borishi natijasini oldindan ko‘ra bilar edi. Dunyo voqealarini ham, mamlakatning ichki hayotidagi islohotlar jarayonlarini ham bevosita oldindan payqar edi va prognoz qila olardi. U ana shu fazilati bilan boshqa davlatlar rahbarlaridan farq qilardi.
"Masalan, 1995 yilda Iqtisodiy hamkorlik tashkilotiga a'zo davlatlar rahbarlarining Ashxobod sammiti bo‘ldi. Bu sammitni Turkmaniston rahbari Safarmurod Niyozov boshqarardi. Endigina mustaqil bo‘lganimizga 4 yil bo‘lgan Ozarboyjon, Markaziy Osiyo davlatlari - yosh davlatlar rahbarlari ishtirok etayotgan sammitda nom chiqargan davlatlardan Eron bilan Turkiya rahbarlari ham ishtirok etishgan. Ularda go‘yoki katta og‘alar singari boshqa respublikalarga rahnamolik qilish, ularning qandaydir ko‘rsatmalari asosida yashashimiz kerak qabilidagi o‘zaro manfaatlar raqobati paydo bo‘lgandi va ikki davlat rahbari siyosiy ta'sir o‘tkazish hamda siyosiy imij borasidagi o‘zaro kurashlar davom etayotganida birdaniga Islom Abdug‘aniyevich "Bir og‘iz gapirsam, maylimi?" degan va, albatta, unga so‘z berilgan.
"Bu yerda Iqtisodiy hamkorlik tashkiloti davlatlari rahbarlari to‘plandik. Demak, biz faqat iqtisodiy hamkorlik masalalarini muhokama qilishimiz kerak va ana shu hamkorlik doirasida ijtimoiy-madaniy hamkorligimizni yo‘lga qo‘yishimiz kerak, deb o‘ylayman. Agar bizning uchrashuvimizga kimdir siyosiy tus berib, allaqanday siyosiy imijlar, siyosiy reytinglarni da'vo qiladigan bo‘lsa, butun mas'uliyatni zimmamga olib aytamanki, O‘zbekiston delegatsiyasi zalni tark etadi".
Bu juda katta jasorat edi. Bu har qanday davlat rahbari aytishga jazm qilavermaydigan gap edi. Islom Karimovning ana shunday favqulodda jo‘shqinlik qudratini namoyish qila oladigan imkoni bor edi. U kishi adolat tarafdori edi".
