09:00 / 12.03.2018
5927

Efiopiyalik harbiylar xatolik tufayli 9 kishini o‘ldirishdi – OAV

Foto: AP

Efiopiyalik harbiylar Keniya bilan chegaradosh Oromiya viloyatidagi amaliyot davomida tinch aholi orasidan kamida 9 kishini o‘ldirishdi, yana 12 kishi jarohat olgan. Bu haqda Efiopiya axborot agentligi ma'lum qildi. 

Ma'lum qilinishicha, armiya bo‘linmalari viloyatning Moyale tumanida “Oromoni ozod qilish fronti” isyonchilariga qarshi kurashish maqsadida joylashtirilgan. 

Ta'kidlanishicha, ushbu holat bilan bog‘liq holda bir necha harbiy o‘z lavozimidan chetlatilib, tergov qilinmoqda. Voqea joyiga tergov o‘tkazish uchun yuqori lavozimli harbiylar delegatsiyasi yo‘llangan. 

15 fevralda Efiopiyada boshlangan xalq g‘alayonlari oqibatida mamlakat bosh vaziri Xaylemariam Desalen o‘z lavozimidan ketgan. 16 fevralda esa hukumat 6 oylik muddatga favqulodda vaziyat tartibini kiritgan.

Efiopiyadagi noroziliklar oromo dehqonlarining poytaxt Addis-Abebening ularning yerlari hisobiga kengaytirilishi rejasiga noroziliklari sabab yuzaga kelgan. Keyinroq ularga amxara etnik jamoasi qo‘shilgan. Ular tigray xalqi tomonidan nazorat qilinuvchi hukumatning adolatsiz yer siyosatiga qarshi norozilik bildirishgan. 2016 yil oktabrdan 2017 yil avgustgacha ham mamlakatda favqulodda vaziyat tartibi amal qilgan. O‘shandagi ommaviy tartibsizliklar vaqtida 600 dan ko‘proq odam halok bo‘lgan.

Top