NATO: AQSh harbiylarining qisqarishi xavf tug‘dirmaydi

19 may kuni general-leytenant Aleksus Grinkevich Vashingtonning Yevropadagi harbiy ishtirokini qisqartirish qarorini izohlar ekan, bu NATOning mudofaa qobiliyatini susaytirmasligini ta’kidladi.

Uning aytishicha, AQSh prezidenti Donald Tramp may oyi boshida Germaniyada amerikalik harbiylarni qisqartirish rejasini e’lon qilgan bo‘lsa-da, bu holat alyans rejalariga jiddiy ta’sir qilmaydi.

Grinkevichning so‘zlariga ko‘ra, qisqa muddatli istiqbolda bu qaror asosan 2022 yilda Rossiyaning Ukrainaga keng ko‘lamli bosqinidan keyin Germaniyaga joylashtirilgan 5 ming nafar amerikalik harbiyga taalluqli bo‘ladi.

Shu bilan birga, u uzoq muddatli istiqbolda Yevropa davlatlari o‘z harbiy salohiyatini kuchaytirayotgani sabab AQSh qo‘shinlarining boshqa mintaqalarga yo‘naltirilishi mumkinligini aytdi.

“Men aniq vaqt jadvalini ayta olmayman, bu bir necha yillik jarayon”, — dedi NATO bosh qo‘mondoni.

Grinkevich, shuningdek, AQSh hozircha Germaniya hududida o‘rta masofaga uchuvchi raketalarni joylashtirmasligini ma’lum qildi. Shu tariqa, u Donald Tramp o‘zidan avvalgi prezident Jo Bayden ma’muriyati davrida tuzilgan kelishuvlarga amal qilmasligini tasdiqladi.

Berlin va Vashington o‘rtasida Bayden ma’muriyati davrida tuzilgan kelishuvga ko‘ra, AQSh 2026 yilda Germaniyaga Rossiya hududidagi nishonlarga zarba bera oladigan o‘rta masofali raketalarni qayta joylashtirishi kerak edi.

Ular qatorida 2500 kilometrgacha masofaga uchuvchi Tomahawk qanotli raketalari hamda yangi gipertovushli qurollar ham borligi aytilgan.

Avvalroq Financial Times nashri Germaniya hukumati AQShdan Tomahawk raketalarini sotib olishni rejalashtirayotgani haqida xabar bergan edi. Shuningdek, Berlin Germaniya hududida mazkur raketalarni ishlab chiqarish bo‘yicha qo‘shma nemis-amerika korxonasi tashkil etish yuzasidan kelishuvga erishishga umid qilmoqda.