Buyuk Britaniya bosh vaziri Tereza Mey parlament a'zolari qarshisidagi chiqishi vaqtida Rossiya Razvedka bosh boshqarmasining Buyuk Britaniyada zaharlangan sobiq polkovnik, Rossiyadagi britaniyalik sobiq ayg‘oqchi Sergey Skripalga uyushtirilgan suiqasd ortida katta ehtimol bilan Rossiya hukumati turgani haqida aytdi. Ma'lum qilinishicha, Skripal va qizi Yuliya Rossiyada ishlab chiqarilgan, asab tolalarini falaj holatga keltiruvchi «Novichok» nomli modda bilan zaharlangan.
Majlisda razvedkachining zaharlanishi bilan bog‘liq o‘tkazilayotgan surishtiruv ishlarining so‘nggi ma'lumotlari e'lon qilindi.
«Hozirga kelib janob Skripal va uning qizi Rossiyada ishlab chiqarilgan o‘ta xavfli zaharli modda bilan zaharlangani ma'lum bo‘ldi. Bu asab tizimini ishdan chiqaruvchi «Novichok» oilasiga mansub zaharli modda», degan Tereza Mey.
«E'tiboringizni shunga qaratmoqchimanki, bu modda Porton Daundagi mudofaa, fan va texnologiyalar sohasidagi yetakchi ekspertlar tomonidan aniqlangan. Bunday modda muqaddam Rossiyada ishlab chiqarilgan, uni Rossiyada yana ishlab chiqarayotgan bo‘lishlari mumkin. Bizning baholashimizcha, Rossiya avvaldan xorijda qotilliklarga buyurtma berib kelgan va katta ehtimol bilan Sergey Skripal va uning qiziga uyushtirilgan suiqasd ortida ham Rossiya turibdi», degan Tereza Mey.
«Yoki bu Rossiya hukumatining bizning mamlakatimizga qarshi qaratilgan to‘g‘ridan-to‘g‘ri harakati yoki Rossiya hukumati bu halokatli xavfga ega modda ustidan nazoratni yo‘qotgan va u begona qo‘llarga tushib qolgan», deya davom etgan Mey xonim.
Tereza Mey Rossiyada seshanba kuni oxirigacha bu hodisa yuzasidan izoh berish uchun muddat borligini ma'lum qilgan.
Uning aytishicha, agar Rossiya tomoni o‘zini oqlovchi dalil keltira olmasa, Skripalning zaharlanishi Rossiya davlati kuchlari Buyuk Britaniya hududida noqonuniy harakatlangan, deb topiladi.
Buyuk Britaniya Tashqi ishlar vazirligi Rossiyaning Londondagi elchisini izoh berishi uchun chaqirgan.
Tereza Meyning aytishicha, TIV rahbariya Boris Jonson rossiyalik elchiga rasmiy Moskva taqiqlangan «Novichok» dasturi haqida to‘liq ma'lumot berishni so‘ragan.
Mey xonimning ma'lum qilishicha, agar Rossiya yetarli tushuntirish bera olmasa, parlamentning navbatdagi yig‘ilishida Buyuk Britaniya hukumati zarur choralarni qo‘llashiga to‘g‘ri keladi. U bunday choralar har qachongidan ham jiddiy bo‘lishiga urg‘u qaratgan.
