Manba: Sergey Skripal va qizi boshqa ism bilan Yangi Zelandiyada yashamoqda

Manbada yozilishicha, Skripallar bir yil davomida Britaniyada maxfiy razvedka tashkiloti MI-6 nazoratida bo‘lib turgach, Yangi Zelendiyaga ketgan. Skripal va qizi boshqa ism-familiya, yangi pasport bilan Britaniyadan chiqarib yuborilgan. Ularga yangi hayot boshlashi uchun yetarlicha pul ham berilgan.

Ma'lum qilinishicha, Skpirallar sobiq qo‘shnilari Ross Kessidi va Mo ismli qo‘shnilari bilan hamon muloqotda bo‘lib turishadi va o‘tgan yil rojdestvoda ularga manzil ko‘rsatmay sovg‘a yuborishgan. «Ular bizni hamon eslashlari yoqimli, ammo ularni yana ko‘ramiz deb o‘ylamayman», degan Kessidi.

GRU sobiq ofitseri Sergey Skripal Britaniya foydasiga josuslik qilgani uchun Rossiyada qamalgan. 2010 yilda esa AQShda qo‘lga olingan bir necha rossiyalik josuslarga asirlarni almashtirish doirasida almashtirilgan va Britaniyaga ketgan.

2018 yil 4 mart kuni Sergey Skripal va uning qizi Yuliya Skripal Solsberidagi xiyobonda behush holda topilgan. Keyinroq ma'lum bo‘lishicha, ular insonni falajlashtiruvchi «Novichok» moddasi bilan zaharlangan. Britaniya bu ishda Rossiyani ayblaydi. Ayblovga ko‘ra, jinoyatni aslida GRU razvedkachilari bo‘lgan, lekin Britaniya hududiga Aleksandr Petrov (aslida ofitser Aleksandr Mishkin) va Ruslan Bashirov (aslida polkovnik Anatoliy Chepiga) ismi bilan kirgan odamlar sodir etgan.

Skripallarning zaharlanishi Rossiya va Britaniya munosabatlariga salbiy ta'sir ko‘rsatdi. London rossiyalik 23 nafar diplomatni mamlakatdan chiqarib yubordi. Moskva ham o‘z navbatida shunday tarzda javob berdi. Rossiya Skripalni zaharlashda aloqasi borligini rad etib keladi.

Skripallar Yangi Zelandiya, Kanada yoki dunyoning istalgan nuqtasida bo‘lishi mumkin

VVS rus xizmati muxbiri Olga Ivshina bu borada shunday deydi:

«Skripallarning Yangi Zelandiyaga ketgani haqida xabarlar ancha oldin ma'lum bo‘lgandi. Ammo bu borada aniq ma'lumot olish imkoni bo‘lmagandi. Hozir Times maxsus xizmatdagi odamga emas, qandaydir «hukumatdagi yuqori lavozimli amaldor»ga asoslanib xabar tarqatgan. Bunga e'tibor berish kerak. Bu ma'lumotni bergan odam maxsus xizmatlar bilan ishlash bo‘limida emas, siyosiy masalalar bilan shug‘ullanadigan bo‘limda ishlashi ham ma'lumotning aniqligiga ta'sir qiladi. Agar Skripallar chindan Yangi Zelandiyaga ketgan va bu operatsiya qiyinchilik bilan amalga oshirilgan bo‘lsa, u haqda hammaga xabar berishdan maqsad nima?

Yangi Zelandiya kichik davlat va u yerda ruslar AQSh yoki Britaniyadagiga qaraganda ancha kam. Skripal esa ingliz tilida sezilarli darajada ruscha aksent bilan gaplashadi. Yangi Zelandiya kabi tinch mamlakatda sobiq razvedkachi qizi bilan kelgani haqidagi xabar tezda tarqalib, ingliz tilida ruscha aksent bilan gapiruvchi va doim qizi bilan yuruvchi keksa odam juda tez ko‘zga tashlangan, ularni qo‘shnilari ham tezda payqab qolgan bo‘lardi.

Yuzini o‘zgartirgan taqdirda ham ularni tomog‘ida nafas olishni yaxshilash uchun qo‘yilgan trubadan qolgan chandiqdan tanib olish mumkin. Skripallar MI-6 nazoratidagi yopiq uyda bir umr yashashni xohlamasligi aniq. Ular zaharlanishdan avval ham, keyin ham oddiy hayot tarzini xohlashlarini aytishgan. Bundan tashqari, Yuliya do‘stlari bilan tez-tez gaplashib turishi ma'lum. Sergey esa kamida ikki marta Rossiyadagi onasiga qo‘ng‘iroq qilgani haqida Times yozgandi.

Katta ehtimol bilan ular allaqachon yangi qo‘shnilar topib, yangicha hayotni boshlab yuborgan. Skripallar aniq qayerda ekani haqida hali beri hech kim bilolmasa kerak...».