Kinoga VIP-chipta sotib olgan erkak o‘rindiq tagida tiqilib qoldi va vafot etdi

Britaniyaning Birmingem shahrida yashovchi shaxs kinoga VIP-joy uchun chipta xarid qildi, o‘rindiq o‘rtasiga tiqilib qoldi va oradan bir qancha vaqt o‘tib yurak xuruji tufayli vafot etdi, deb xabar qilmoqda Daily Star.

Nashrning yozishicha, erkak seans oxirida telefonini o‘rindiq tagiga tushirib yuborgan hamda uni olishga harakat qilgan. Britaniyalik pastga egilganida, uning boshi o‘rindiqning elektr harakatlanuvchi oyoq qo‘yadigan joyi ostida tiqilib qolgan. Erkakni faqatgina o‘sha joy buzib tashlanganidan keyingina chiqarib olishdi.

Jabrlanuvchi yurak xuruji bilan kasalxonaga yetkazildi. Shifokorlar uning yuragini yana ishlatib yuborishgan, biroq bir hafta o‘tib erkak vafot etdi.