Dunyoning eng qimmat shaharlari reytingida beshinchi yil ketma-ket Singapur yetakchilik qilmoqda. Eng arzon shahar sifatida esa Damashq e'lon qilindi. The Telegraph shu haqida xabar berdi.
Eng qimmat shaharlar reytingining ikkinchi o‘rni o‘tgan yilga nisbatan besh pozitsiyaga ko‘tarilgan Parijga nasib etdi. Yetakchilar uchligini bir pog‘ona yuqorilagan Tsyurix yakunlaydi. Shuningdek sezilarli darajada o‘sishni qayd etgan shaharlar orasida Oslo va Sidney nomlari keltirilgan.
Suriyaning Damashq shahri dunyoning eng arzon shahri deya e'lon qilindi. O‘tgan yili bu o‘rinda Olmaota nomi qayd etilgan edi, bu yil u ikkinchi o‘rindagi eng arzon shahar. Shuningdek eng arzon shaharlar o‘nligidan Karakas (Venesuela), Lagos (Nigeriya), Bangalor (Hindiston), Karachi (Pokiston), Jazoir (Jazoir), Chennay (Hindiston), Buxarest (Ruminiya) va Nyu-Dehli (Hindiston) o‘rin olgan.