Visual Capitalist platformasi Broadband Genie ma’lumotlari asosida tayyorlagan tahlilda turli mamlakatlardagi statsionar keng polosali internetning o‘rtacha oylik narxi taqqoslangan.
Tadqiqot natijalariga ko‘ra, internet narxi eng arzon va eng qimmat mamlakatlar o‘rtasidagi farq 140 barobardan ham ortiqni tashkil etgan.
Reytingda Fransiyaning Tinch okeanidagi Uollis va Futuna hududi eng qimmat internet bozori sifatida qayd etilgan. Keyingi o‘rinlarni Turkmaniston hamda Terks va Kaykos orollari egallagan.
Mutaxassislar bu holatni asosan geografik omillar bilan izohlamoqda. Eng qimmat internet bozorlarining 25 tasidan 18 tasi orol davlatlari yoki orol hududlari hisoblanadi. Bunday hududlarda internet infratuzilmasini qurish va saqlash xarajatlari yuqori bo‘lib, bu xarajatlar nisbatan kam sonli abonentlar o‘rtasida taqsimlanadi.
Shu bilan birga, aholi sonining kamligi va raqobat muhitining cheklanganligi ham narxlarning yuqori bo‘lishiga ta’sir ko‘rsatadi.
Tahlilda qayd etilishicha, so‘nggi o‘n yilda internetdan foydalanuvchilar soni jadal o‘sgan. Agar 2015 yilda dunyo aholisining 43 foizi internetga ulangan bo‘lsa, 2025 yilga kelib bu ko‘rsatkich 68 foizga yetgan. Shu sababli internet xizmatlarining iqtisodiy jihatdan hamma uchun ochiq bo‘lishi tobora muhim ahamiyat kasb etmoqda.
Reytingning ikkinchi uchida esa internet narxi juda past bo‘lgan mamlakatlar joylashgan. Eng arzon internet Eronda qayd etilgan. Mutaxassislar buni milliy valuta qiymatining pasayishi va davlat subsidiyalari bilan izohlamoqda.
Erondan keyin Ukraina, Efiopiya va Bangladesh internet eng arzon davlatlar qatoriga kirgan.
Qizig‘i shundaki, arzon internet har doim ham xizmat sifati past degani emas. Masalan, Ruminiya va Vetnam internet narxi bo‘yicha eng arzon davlatlar qatorida bo‘lishi bilan birga, statsionar internet tezligi bo‘yicha ham dunyo yetakchilari safiga kiradi.
Bu holat kuchli raqobat muhiti va zamonaviy infratuzilmaga kiritilgan investitsiyalar bir vaqtning o‘zida ham arzon narx, ham yuqori sifatni ta’minlashi mumkinligini ko‘rsatadi.
