Isroil BMT bilan afrikalik muhojirlar haqidagi kelishuvini bekor qildi

Isroil bosh vaziri Binyamin Netanyaxu Isroilda minglab afrikalik muhojirlarning joylashishini qonunlashtirishni ko‘zda tutgan tashabbusning bekor qilinishini ma'lum qildi. 

U tumanlarida sudanlik va eritreyalik muhojirlar bo‘lganidan norozi bo‘lgan Tel-Avivning janubidagi aholi bilan uchrashuvda muammoning muqobil yo‘llarini izlashni davom ettirishga va'da bergan.

“Oxirgi 24 soat ichida men ichki ishlar vaziri Are Deri, professional hamjamiyatlar va janubiy Tel-Aviv aholisi vakillari bilan maslahatlashuvlar o‘tkazdim. Natijada men kelishuvning ustun tomonlari va kamchiliklarini baholab, uni bekor qilishga qaror qildim”, deb aytgan Netanyaxu.

Bekor qilingan loyiha BMTning qochqinlar ishlari agentligi bilan birgalikda ishlab chiqilgan. U 16 ming afrikalikning Kanada, Germaniya yoki Italiya kabi rivojlangan davlatlarga ko‘chirib o‘tkazilishini nazarda tutgan. Isroil hukumati ham deyarli shuncha miqdordagi muhojirlarni Isroilda joylashishini qonuniylashtirmoqchi va muhojirlarni butun mamlakat bo‘ylab teng taqsimlab, ishga joylashishlarida yordam bermoqchi bo‘lgan. 

Ushbu tashabbus afrikaliklarning Ruandaga majburiy jo‘natilishi loyihasi o‘rnini egallashi kerak edi.