Tojikiston Shimoliy Koreyani yadroviy qurolsizlantirish rezolyutsiyasiga rioya qilishga chaqirdi

Tojikiston tashqi ishlar vaziri Sirojidin Aslov Tojikistonga amaliy tashrif bilan kelgan shimoliy koreyalik hamkasbi Li Yon Xoni BMTning yadroviy qurolsizlantirish haqidagi rezolyutsiyasiga qat'iy rioya qilishga chaqirdi.

“Tojikiston Shimoliy Koreyaning xalqaro huquq doirasida o‘z manfaatlarini himoyalashga intilishlarini tushunadi. Shu bilan birga Tojikiston Shimoliy Koreyani BMT Xavfsizlik kengashining Koreya yarimorolini yadroviy qurolsizlantirish bo‘yicha tegishli rezolyutsiyalariga rioya qilishga chaqiradi”, deb aytilgan Tojikiston tashqi ishlar vazirligi saytida.

Aslov Tojikiston Koreya yarimorolidagi muammolarni tinchlik yo‘li bilan hal qilish va hududda tinchlik va barqarorlikni ta'minlash tarafdori ekanligini ta'kidlab o‘tgan.

Ikki davlat vakillari, shuningdek, Tojikiston va Shimoliy Koreya o‘rtasidagi ikki tomonlama hamkorlikning dolzarb mavzularini, jumladan mintaqaviy va xalqaro xarakterdagi masalalarni muhokama qilishgan.