21:32 / 23.04.2018
18365

Turkmaniston prezidenti O‘zbekistonga Kaspiy dengizi port infratuzilmalaridan foydalanishni taklif etdi

Turkmaniston prezidenti Gurbanguli Berdimuhamedov O‘zbekistonga Kaspiy qirg‘og‘i port infrastrukturasidan foydalanish imkoniyatlarini o‘rganib chiqishni taklif qildi. Bu haqda u O‘zbekiston prezidenti Shavkat Mirziyoyev bilan o‘tkazilgan muzokaralar yakunida jurnalistlarga ma'lum qildi.

«Turkmaniston ham Yevropa, ham Yaqin Sharq bozoriga chiqish bo‘yicha O‘zbekiston – Turkmaniston – Kaspiy dengizi – Janubiy yo‘lak yo‘nalishi bo‘yicha yo‘lak yaratilishida hamkorlik qilishga tayyor», — deya Gurbanguli Berdimuhamedovning so‘zlarini keltirgan «Gazeta.uz».

Turmaniston prezidenti Shavkat Mirziyoyevni 2 may kuni Turkmanboshi shahridagi xalqaro dengiz bandargohi ochilish marosimida qatnashish uchun taklif etdi.

Shuningdek, u oldinroq erishilgan kelishuvlar, jumladan, Markaziy Osiyo – Yaqin Sharq tranzit koridorini (Qozog‘iston – O‘zbekiston – Turkmaniston – Eron – Ummon yo‘nalishida) tashkil etish bo‘yicha ishlarni amalga oshirishni yoqlab chiqqan.

Turkmaniston prezidenti 23 aprel kuni O‘zbekistonga davlat tashrifi bilan keldi. 24 aprel kuni Gurbanguli Berdimuhamedov Xorazm viloyatiga borishi kutilmoqda.

Top