Kuni kecha ichki ishlar organlari xodimlari bilan hamkorlikda tungi xizmatni olib borayotgan O‘zbekiston Respublikasi Milliy gvardiyasi Sirdaryo viloyati 86528-sonli harbiy qism harbiy xizmatchisi tomonidan qo‘lida qop bo‘lgan shubhali shaxs to‘xtatilgan. Uning shaxsi aniqlashtirilganda 1990 yilda Baxt shahrida tug‘ilgan, fuqaro L. U. ekanligi ma'lum bo‘lgan. Bu haqda KUN.UZ'ga O‘zbekiston Respublikasi Milliy gvardiyasi matbuot xizmati xabar berdi.
U so‘rov jarayonida Guliston shahar 3-mavzesida joylashgan oziq-ovqat mahsulotlarini sovitish va saqlashga ixtisoslashtirilgan “Grin layn” MChJ binosiga derazani buzish yo‘li bilan kirib, u yerdagi saqlanayotgan pullarni o‘g‘irlab ketayotganligi ma'lum bo‘ldi. Jinoyatchi ushlangan zahotiyoq bu ishidan pushaymonligini bildirgan.
Qopda har xil kupyuradagi jami 37 300 200 so‘m pul mablag‘lari mavjudligi aniqlandi. Mazkur ish bo‘yicha dastlabki surishtiruv-tergov ishlari olib borilyapti.
