Pokistonda dunyoning uchinchi eng yirik masjidi qurilmoqda

Pokistonning Karachi shahrida tez orada kattaligi bo‘yicha dunyoda uchinchi o‘rinda qayd etiluvchi masjid qad ko‘taradi. Islam-today nashri shu haqida xabar berdi.

Manbaga ko‘ra, u o‘z maydoniga ko‘ra faqat Saudiya Arabistonidagi ikki muqaddas masjid - Makkadagi Masjid Al-Haram va Madinadagi Masjid An-Nabaviydan ortda qoladi. Pokistondagi yangi masjidda bir vaqtning o‘zida 800 ming nafargacha kishi ibodat qilishi mumkin.

Masjid dizayni Turkiya, Eron, Kuvayt va BAAda mashhur islom an'anaviy uslubiga xos bo‘lishi ma'lum qilingan.

Kompleksdan shuningdek Islom madaniyat markazi, Islom tadqiqot markazi, Islom muzeyi va Xalqaro universitet ham o‘rin olishi kutilmoqda.