BAAda sarmoyachilar va malakali mutaxassislar uchun 10 yillik vizalar joriy qilinadi 

BAA sarmoyachilar va malakali mutaxassislar, jumladan shifokorlar, muhandislar hamda iste'dodli talabalar uchun yangi 10 yillik rezidentlik vizalarini joriy qilmoqchi. Avval rezidentlik vizasi muddati 3 yilni tashkil qilgan.  

Sarmoyalar va malakali mutaxassislarni jalb qilish bo‘yicha yangi choralar haqida BAA bosh vaziri, Dubay hokimi shayx Muhammad bin Rashid Al Maqtum tvitterda ma'lum qildi. U BAAga sarmoyalar va iste'dodlarni jalb qilishga ko‘mak beruvchi omillar orasida “ochiq-oydinlik va sabr-toqatlik muhiti, infratuzilma va qulay qonunchilikni” ta'kidlab o‘tdi.  Shuningdek, xorijiy sarmoyachilarga BAAdagi kompaniyalarda 100 foiz ulushga ega bo‘lishga ruxsat berildi. Avval buning faqat maxsus iqtisodiy hududlarda iloji bo‘lgan. BAA bosh vaziri yangi qoidalar joriy yil oxirigacha kuchga kirishini qo‘shimcha qilgan.