Singapurda Tramp va Kim Chen In uchrashuvi arafasida xavfsizlik choralari kuchaytirildi

Singapur hukumati AQSh prezidenti Donald Tramp va Shimoliy Koreya yetakchisi Kim Chen Inning tashrifi vaqtida xavfsizlikni ta'minlashga qaratilgan qo‘shimcha choralarni ko‘rdi. Bu haqda “Ryonxap” axborot agentligi xabar bermoqda.   

Ma'lum qilinishicha, sammit uchun katta ahamiyatga ega hududlar politsiyaning alohida nazoratiga olingan. 

Jumladan, gap sammit o‘tadigan Sentosa orolidagi “Kapella” hamda Tramp va Kim Chen to‘xtaydigan “Shangri-La” va “Sent-Rejis” mehmonxonalari haqida ketmoqda.

Bu hududlarga qo‘shimcha politsiya kuchlari jalb qilingan, to‘siqlar o‘rnatilgan hamda tekshiruvlar o‘tkazilmoqda. Mahalliy politsiya sammit sababli transport qatnovidagi buzilishlarga sabr va tushunish bilan qarashga chaqirgan.

Bundan avvalroq Singapur tashqi ishlar vaziri Vivian Balakrishna mamlakati sammit o‘tkazilishiga to‘liq tayyorligini ma'lum qilgandi.