Qoʻshimcha funksionallar
-
Tungi ko‘rinish
Tramp Eron bo‘yicha yangi shartlarni ochiqladi
AQSh prezidenti Donald Tramp Vashington Eron bilan ehtimoliy kelishuv doirasida Tehron aktivlarini oldindan muzdan chiqarmasligi va sanksiyalarni bekor qilmasligini bildirdi. Uning ta’kidlashicha, bu kabi qadamlar faqat tinchlik kelishuviga erishilganidan keyingina muhokama qilinishi mumkin.
NBC News telekanaliga bergan intervyusida Tramp Eronga nisbatan iqtisodiy cheklovlarni yumshatish yoki mamlakat aktivlarini ozod qilish masalasi hozircha kun tartibida emasligini aytdi.
«Bu keyinroq bo‘ladi. Agar ular o‘zini munosib tutsa va yaxshi ish qilsa, shundan keyin bu haqda gaplashishni boshlaymiz», — dedi AQSh prezidenti.
Trampning so‘zlariga ko‘ra, sanksiyalarni bekor qilish yoki muzlatilgan mablag‘larga ruxsat berish Vashington uchun muzokaralarning boshlang‘ich sharti emas, balki ehtimoliy kelishuv natijasi bo‘lishi mumkin.
Livan masalasi kelishuvning majburiy qismi emas
Oq uy rahbari intervyu davomida AQSh Eron bilan qisqa muddatli kelishuv tuzish jarayonida Livan masalasini majburiy shart sifatida qo‘ymayotganini ham ma’lum qildi.
Uning ta’kidlashicha, Tehron Livan bilan bog‘liq masalalarni muzokaralarga kiritishni xohlashi mumkin, ammo Vashington buni talab qilmayapti.
Shu bilan birga, Tramp Isroilni Livandagi «Hizbulloh» harakatiga qarshi amaliyotlarda ehtiyotkorroq bo‘lishga chaqirdi.
«Men Livanda hayot yaxshiroq bo‘lishini xohlayman. “Hizbulloh”ga qarshi zarbalar yanada aniq va maqsadli bo‘lishi kerak deb hisoblayman», — dedi u.
Xominaiy bilan uchrashuv ehtimoli
Tramp intervyuda Eron oliy rahbarining vorisi sifatida ko‘rilayotgan Mujtabo Xominaiy bilan to‘g‘ridan to‘g‘ri muzokaralar o‘tkazish ehtimolini ham istisno qilmadi.
Jurnalistlar uning aniq qayerda ekani haqida savol berganida, AQSh prezidenti bu haqda batafsil ma’lumot berishni istamadi.
«Uning qayerda ekanini bilamanmi-yo‘qmi, bu haqda gapirishni istamayman. Ammo bilishim ehtimoli juda yuqori», — dedi Tramp.
Vashington va Tehron muzokaralarni davom ettirmoqda
Avvalroq Axios nashri AQSh va Eron vakillari qurolli mojaroni hal etish bo‘yicha dastlabki kelishuv loyihasi yuzasidan muayyan kelishuvga yaqinlashganini xabar qilgan edi.
Biroq hozircha hech qanday yakuniy hujjat imzolanmagan. AQSh tomoni Erondan yadroviy qurol yaratish dasturidan voz kechishni asosiy talablardan biri sifatida ilgari surmoqda.
Eron rahbariyati ham AQSh bilan urushni to‘xtatish bo‘yicha yakuniy kelishuv hali imzolanmaganini ma’lum qilgan.
Kuzatuvchilar fikricha, Trampning so‘nggi bayonotlari Vashingtonning Eronga nisbatan bosim siyosatini saqlab qolgan holda diplomatik yechim izlashda davom etayotganini ko‘rsatadi.
