Turkiya prezidenti Rajab Toyyib Erdo‘g‘an yana BMT tuzilmasini isloh etishga chaqirdi. U Xavfsizlik kengashi shakllanishini adolatsiz tizim, deb atagan.
"Jahon hamjamiyati taqdiri Xavfsizlik kengashining beshta doimiy a'zosi qo‘lida ekani tushunarsiz bir holat", - deya ma'lum qilgan Erdo‘g‘an. U Istanbuldagi saylovoldi mitingida shunday bayonot berdi, deb xabar qilmoqda Anadolu.
Turkiya yetakchisining so‘zlariga ko‘ra, jahondagi barcha mamlakatlar BMT Xavfsizlik kengashi ishida ishtirok etish imkoniyatiga ega bo‘lishi lozim. Turkiya prezidentining qo‘shimcha qilishicha, BMT faoliyatidagi muammolar tashkilotga aniq muammolarga yechim topish imkoniyatini bermayapti, jumladan, “Isroil tomonidan Falastinning bosib olingan yerlarida terror siyosatiga” ham.
