Rossiyaning Londondagi elchixonasi NATO bosh kotibi Yyens Stoltenbergning Solsberida GRU sobiq polkovnigi Sergey Skripal va uning qizi Yuliya zaharlanishida Rossiya aybdor ekaniga oid bayonoti «qo‘pol va mas'uliyatsiz yolg‘on xabar» ekanini ma'lum qildi. Bu haqda RIA «Novosti» xabar bermoqda.
Diplomatik missiya vakilining so‘zlariga ko‘ra, Stoltenberg o‘z bayonoti bilan xalqaro hamjamiyatni noto‘g‘ri fikrlashga undamoqda.
«Agarda janob Stoltenberg qandaydir dalillarga ega bo‘lsa, u ularni darhol taqdim etishi kerak. Hozircha esa uning so‘zlari - asossiz bayonot bo‘lib, unda na dalillar, na isbotlar bor», - degan manba.
Uning ta'kidlashicha, hozirgi vaqtda ro‘y bergan hodisani surishtiruvdan o‘tkazish hali yakunlanmadi. Shuningdek, manba eslatishicha, 1 may kuni Buyuk Britaniya bosh vazirining milliy xavfsizlik bo‘yicha maslahatchisi Mark Sedvill rasmiylarda gumonlanuvchilar yo‘qligi haqida ma'lum qildi.
