Sofiya Rossiyaga qarshi yangi cheklovlarga qarshi chiqdi

Radev bu haqda 18 iyun kuni Bryusselda bo‘lib o‘tgan Yevropa Ittifoqi yig‘ini oldidan jurnalistlar bilan muloqotda ma’lum qildi. Uning so‘zlariga ko‘ra, yangi sanksiyalar Bolgariya uchun strategik ahamiyatga ega bo‘lgan bir qator sohalarga jiddiy ta’sir ko‘rsatishi mumkin.

Xususan, bosh vazir mamlakatdagi yonilg‘i bozorining muhim ishtirokchilaridan biri bo‘lgan «Lukoyl» kompaniyasi faoliyati xavf ostida qolishidan xavotir bildirdi. Kompaniya Bolgariyadagi yagona neftni qayta ishlash zavodiga egalik qiladi hamda mamlakatda motor yonilg‘isi sotuvining katta qismini ta’minlaydi.

«Lukoyl» faoliyati uchun jiddiy xavf mavjud. Biz kompaniyani sanksiyalar ro‘yxatidan chiqarishni xohlaymiz», — dedi Radev.

Shuningdek, u yangi cheklovlar Sofiya metropoliteni uchun ehtiyot qismlar yetkazib berishda muammolar keltirib chiqarishi, shu bilan birga qishloq xo‘jaligi uchun zarur bo‘lgan o‘g‘itlar ta’minotiga ham ta’sir ko‘rsatishi mumkinligini ta’kidladi.

Bolgariya rahbari taklif etilayotgan sanksiyalar Rossiya Pravoslav cherkovi rahbari — patriarx Kirillga nisbatan ham qo‘llanishi rejalashtirilayotganiga qarshi ekanini bildirdi. Uning fikricha, bu masala qo‘shimcha muhokamani talab qiladi.

«Bu sanksiyalar shu vaqtgacha urushni qay darajada to‘xtatdi? Ular tinchlik o‘rnatishga qay tarzda yordam berdi?» — dedi Radev.

Shu bilan birga, Bolgariya bosh vaziri mamlakat Ukrainaning Yevropa Ittifoqiga a’zo bo‘lish bo‘yicha muzokaralarini qo‘llab-quvvatlashini ta’kidladi.

Yevropa Ittifoqi 15 iyun kuni Rossiyaga qarshi sanksiyalar ro‘yxatini yanada kengaytirib, unga 34 nafar jismoniy va 47 ta yuridik shaxsni kiritgan edi. Yangi cheklovlar Rossiya harbiy-sanoat kompleksi bilan bog‘liq kompaniyalar, neft eksporti bilan shug‘ullanuvchi tashkilotlar va «soya floti» bilan aloqador tuzilmalarga nisbatan joriy etilgan.

Sanksiyalar ro‘yxatiga Rossiya, Turkiya, Liberiya, Birlashgan Arab Amirliklari, Ozarboyjon va Hongkongda faoliyat yurituvchi qator kompaniyalar, shuningdek, Rossiyaning ayrim jamoat va diniy arboblari ham kiritilgan.