Samarqandda «Shahar haftaligi» festivali bo‘lib o‘tmoqda

Samarqand shahrida ichki turizmni rivojlantirish maqsadida 29 iyundan 4 iyulga qadar «Shahar haftaligi» festivali bo‘lib o‘tmoqda. Festival doirasida mamlakatimiz aholisi va xorijlik sayyohlarda qiziqish uyg‘otish maqsadida madaniy-ko‘ngilochar dasturlar namoyish etilmoqda.

Shu maqsadda Registon maydonidagi Sherdor madrasasida brifing bo‘lib o‘tdi. Brifingda viloyat hokimining turizm masalalari bo‘yicha o‘rinbosari M.Voseyev chiqish qildi va festival maqsadlarini bayon etdi. Maydonda «Samarqand sadolari» maqom ansamblining konserti namoyish etildi.

Registon maydonida respublika aeronavtika markazi vakillari ikkita havo sharini to‘ldirib, shahardagi mehribonlik uyi tarbiyalanuvchilarini uchirishdi.

Keyingi kunlarda shahardagi «Hunarmand» markazida shahar hunarmandlari ishtirokida master-klass o‘tkazildi. Festival kunlari «Tungi bozor» tashkil etilib, shahar aholisi va mehmonlari uchun tungi soat 12 gacha bozorlar faoliyat ko‘rsatib turdi. Shuningdek, sog‘lom turmush tarzini targ‘ib etish uchun velosiped turi tashkillashtirildi.

3 iyul kuni «Muzeylar kuni» o‘tkazildi. Imtiyozli ravishda shahardagi tarixiy, madaniy va ma'naviy meros maskanlariga ziyoratlar uyushtirildi.

«Shahar haftaligi» festivalini 4 iyul kuni katta konsert dasturi bilan nihoyalash nazarda tutilgan.

O‘z muxbirimiz.