Tunis poytaxti meri etib ilk bor ayol kishi saylandi

Tunis tarixida ilk bor poytaxt Tunis shahri kengashi mer lavozimiga ayol kishi – “An-Naxda” partiyasidan Suad Abdurahimni sayladi. Bu haqda Middle East Eye nashri ma'lum qildi.    

Ma'lumotlarga ko‘ra, shahar kengashining 26 a'zosi o‘z ovozini Abdurahimga, 22 a'zosi esa uning raqibi Kamol Idirga bergan.

53 yoshli Abdurahim may oyidagi munitsipal saylovlarda g‘olib bo‘lgan, biroq u shahar kengashi a'zolarining zarur ovozini to‘play olmagan.

“Men buni Tunis ayoli uchun faxr deb bilaman”, deb aytgan Abdurahim.

Ta'kidlanishicha, Suad Abdurahim “o‘z partiyasining ochiqligi va zamonaviy qadriyatlar qabul qilish ramzi” hisoblanadi.