Irlandiya konstitutsiyasidan ayollar ishlamasligi kerakligi haqidagi moddani chiqarib tashlash taklif qilindi

Irlandiya hukumati mamlakat konstitutsiyasidan ayollarning oiladagi o‘rni haqidagi moddani olib tashlash borasida referendum o‘tkazishga qaror qildi, deb xabar berdi Irlandiyaning RTÉ telekompaniyasi.

Gap «oiladagi o‘rni tufayli ayol davlatni qo‘llab-quvvatlashi» hamda «onalar mehnat bilan shug‘ullanish uchun iqtisodiy zaruriyatga ega bo‘lmasliklari» qayd etilgan 41.2-modda haqida bormoqda.

Referendumni 2018 yil oktabrida, prezident saylovi bilan bir kunda o‘tkazish rejalashtirilmoqda.

Adliya vaziri Charli Flenagan konstitutsiya qabul qilinganidan 80 yil o‘tib, unda 41.2-moddaga o‘rin yo‘qligi ma'lum bo‘lganini bildirdi.

«U gender tenglikka erishish borasidagi zamonaviy maqsadga putur yetkazadi», — dedi Flenagan.