Dublinda migrantlarga qarshi tartibsizliklar davom etmoqda. Bu haqda nimalar ma’lum?

Chorshanba kuni kechqurun Irlandiya poytaxti Dublin shahrida boshpana so‘rab murojaat qilgan xorijliklar yashovchi mehmonxona oldida davom etayotgan tartibsizliklar doirasida ikki politsiyachi jarohat olib, 20 dan ortiq kishi hibsga olindi. Namoyishlarga bir erkak shu mehmonxona yaqinida 10 yoshli qizga nisbatan jinsiy zo‘ravonlik qilishda ayblangani sabab bo‘lgan.

Nimalar bo‘lmoqda?

Boshpana so‘rab kelganlar yashaydigan Citywest mehmonxonasi yonida chorshanba kuni kechqurun asosan o‘smirlar va yoshlardan iborat namoyishchilar to‘plandi, deb xabar bermoqda RTE Irlandiya politsiyasiga (Garda) tayanib.

Ular politsiyachilarga shishalar va mushakbozlik otishgan, keyin esa yo‘l va tramvay bekatidagi tosh devorlarni buzib, toshlarni uloqtira boshlashgan.

Politsiya namoyishchilar ko‘payishiga yo‘l qo‘ymaslikka harakat qilgan. Oqibatda ikki xodim jarohatlangan: birining yelkasi shikastlangan, ikkinchisining boshiga shisha tekkan.

Politsiyachilar suv purkagich (vodomyot) qo‘llashga tayyor edi, ammo bunga hojat qolmagan.

23 kishi qo‘lga olingan. Yaqin kunlarda ularga nisbatan jamoat tartibini buzish bo‘yicha ayblov e’lon qilinishi kutilmoqda.

Bu Dublindagi tartibsizliklar ikkinchi kun davom etishi. RTE ma’lumotlariga ko‘ra, seshanba kuni Citywest mehmonxonasi yaqinida 2 ming kishi tinch namoyishga to‘plangan, biroq tez orada niqob taqqan odamlar shishalar va toshlar uloqtira boshlagan va politsiya mashinasiga o‘t qo‘ygan.

Birinchi kuni olti kishi hibsga olingan, bir politsiyachi oyog‘idan jarohatlangan.

Tartibsizlik ikki yarim soatga yaqin vaqt davom etgan, shundan keyin yig‘ilganlar tarqala boshlagan.

Tartibsizliklarga nima sabab bo‘ldi?

Norozilik namoyishiga 10 yoshli qizga nisbatan jinsiy zo‘ravonlik sodir etilgani haqidagi xabar sabab bo‘lgan. Hodisa dushanba kuni erta tongda boshpana izlab kelganlar yashaydigan mehmonxona yaqinida sodir bo‘lgan. Politsiya gumonlanuvchini qo‘lga olgan.

Seshanba kuni 26 yoshli erkakka (Irlandiya qonunlariga ko‘ra uning shaxsi oshkor etilmaydi) ayblov e’lon qilindi. U haqda ko‘p tafsilotlar ma’lum emas: sudda faqat ayblanuvchi ishsizligi aytilgan, uning advokati esa arab tilidan tarjimon so‘ragan.

Hukumat qanday reaksiya qildi?

Politsiya komissari Jastin Kelli tartibsizliklarga mutlaqo yo‘l qo‘yib bo‘lmasligini aytdi. Politsiya tartibsizliklar onlayn tarzda rejalashtirilganini taxmin qilmoqda.

Irlandiya bosh vaziri Mixol Martin politsiyachilarga jasorati va professionalligi uchun minnatdorchilik bildirdi.

«Garda – bu bizning jamoamizdan bo‘lgan odamlar. Ular hammamizni himoya qilish uchun shu yerda. Bu odamlar [tartibsizlik ishtirokchilari] ularni bu qadar jirkanch tarzda haqorat qilishi, keyin esa bunday shafqatsizlik bilan hujum qilishi mumkinligiga ishonib bo‘lmaydi», – dedi u.

Adliya vaziri Jim O'Kallagan ham Garda xodimlarining professionalligini e’tirof etdi. U tartibsizliklar ishtirokchilari «jamiyatga nifoq solish»ga urinayotganini ta’kidlab, ular jiddiy qarshilikka uchrashini va’da qildi.

Yarim yildan kamroq vaqt oldin, 2025 yil iyun oyida Shimoliy Irlandiyada ham shunday tartibsizliklar bo‘lib o‘tgandi. O‘shanda Ballimina shahrida jinsiy zo‘ravonlikdan jabr ko‘rgan o‘smir qizning oilasini qo‘llab-quvvatlash uchun boshlangan tinch namoyish bir necha kunga cho‘zilgan tartibsizliklarga aylangan.