AQShda qurol savdosiga qarshi kurashni kuchaytirish tarafdorlari yirik norozilik namoyishi tashkil etishdi va Chikagodagi avtoshosselardan birini to‘sib qo‘yishdi, deb xabar berdi CNN.
Xabarga ko‘ra, namoyishchilar shahardagi avtotrassalardan birida yurish uyushtirishgan. Avvaliga politsiya yo‘lni to‘sishga uringanlar hibsga olinishini ma'lum qilgan. Lekin keyinroq hukumat namoyishga ruxsat berdi.
Namoyishchilar norozilik aksiyasi orqali o‘qotar qurollar sababli har yili yuzlab kishilar halok bo‘ladigan Chikago shahridagi vaziyatga jamoat e'tiborini jalb qilish niyatida ekanliklarini bildirishdi. Ular qurol savdosiga qarshi qonunlarni yanada kuchaytirishni so‘rashmoqda.
Chikago AQShdagi jinoyatchilik eng ko‘p sodir etiladigan shaharlardan biridir. Shahar politsiyasining ma'lumotiga ko‘ra, joriy yilning birinchi yarim yilligida shaharda 1,1 ming martadan ortiq o‘qotar quroldan foydalanish holati va 250ta qotillik qayd etilgan. Associated Press agentligining qayd etishicha, aksariyat jinoyatlar shaharning kam daromad topadigan qora tanli aholi yashaydigan tumanlarida sodir etiladi.
