Tramp Putin bilan yana uchrashish istagini bildirdi

AQSh prezidenti Donald Tramp Rossiya prezidenti Vladimir Putin bilan yangi uchrashuv o‘tkazish istagini bildirdi. U bu haqda 19 iyulda tvitterdagi sahifasida ma'lum qildi.

Trampning aytishicha, Xelsinkidagi sammit ba'zi “yolg‘onchi nashrlar” tomonidan qanday taqdim qilinishiga qaramasdan, juda muvaffaqiyatli o‘tgan. “Biz muhokama qilgan hajmdagi bir qator masalalarni, jumladan terrorchilikka qarshi kurash, Isroil xavfsizligi, yadroviy qurolni tarqatmaslik, kiberhujumlar, savdo, Ukraina, Yaqin Sharqdagi tinchlik, Shimoliy Koreya va boshqa masalalarni amalga oshirishni boshlash mumkin bo‘lishi uchun yangi uchrashuvimizni kutib qolaman”, deb aytgan Tramp.

Tramp qo‘yilgan savollarga ko‘plab javoblar borligini, ulardan ba'zilari murakkab, ba'zilari oson ekanligini qo‘shimcha qilgan. “Biroq ularning BARChASI hal qilinishi mumkin”, deb yozgan Tramp. 

Tramp va Putinning ilk to‘liq formatli uchrashuvi Xelsinkida 16 iyulda bo‘lib o‘tgan. Muzokaralar 4 soatga yaqin davom etgan.