Afg‘onistonning milliy xavfsizlik masalalari bo‘yicha maslahatchisi Muhammad Hanif Atmar Yevropa Ittifoqi delegatsiyasi rahbari Per Mayodon va Buyuk Britaniya elchisi Nikolas Keyni qabul qildi. Bu haqda Afg‘oniston milliy xavfsizlik xizmati xabar qilmoqda.
Ma'lum qilinishicha, har ikkala uchrashuvdan ko‘zlangan maqsad NATOning “Hal qiluvchi ko‘magi” missiyasini muhokama qilishdir. Muzokaralar afg‘on kuchlarini birlashtirish va mamlakatda tinchlik o‘rnatish haqida bo‘lishi nazarda tutilgan.
Xususan, Per Mayodon Afg‘oniston politsiyachilari (jumladan, ayol xodimlar)ni o‘qitish va malakasini oshirish kerakligi va ushbu sa'y-harakatlar inson huquqlarini himoya qilish nuqtayi nazaridan juda muhimligini ta'kidlagan. Rasmiy xabarda aytilishicha, keyingi navbatda mamlakatning strategik rejasi haqida gap ketdi. Key afg‘on hukumatining Tolibon harakati a'zolari bilan tinchlik muzokaralarini o‘tkazishini qo‘llab-quvvatladi va bu kabi tashabbus keyinchalik ham davom etishidan umid qildi.
